Prokuroria pranë Gjykatës së Shkallës së Parë të Juridiksionit të Përgjithshëm Tiranë ka dhënë tetë masa sigurie në kuadër të hetimeve për veprat penale “Falsifikimi i dokumenteve” dhe “Fshehja e të ardhurave”, të kryera në bashkëpunim, sipas neneve 186/2 dhe 180/3 të Kodit Penal.
Procedimi penal nr. 4472 i vitit 2025, i zhvilluar në bashkëpunim me Drejtorinë e Hetimit Tatimor dhe Seksionin e Krimit Ekonomik-Financiar në Policinë e Tiranës, ka zbuluar një skemë të organizuar mashtrimi në sektorin farmaceutik.
Në qendër të hetimeve ndodhet shtetasi Frigul Milla, administrator i subjektit “CFO Pharma”, i cili dyshohet se ka përdorur subjektet “Pharma Plus” dhe “Nedix Albania”, përmes administratorëve të tyre, për të krijuar fatura dhe inventarë fiktivë në sistemin “Edepo”. Këto të dhëna të rreme kanë shërbyer për shitjen e barnave të rimbursueshme “Foster” dhe “Trimbow”, duke i mundësuar “CFO Pharma” të përfitonte fonde nga Fondi i Sigurimit të Detyrueshëm të Kujdesit Shëndetësor (FSDKSH).
Hetimet nisën pas kallëzimit të shtetasit Ilir Shehu, administrator i kompanisë “Medicamenta”, importues ekskluziv farmaceutik i licencuar nga FSDKSH, i cili denoncoi veprimtari të kundërligjshme të “CFO Pharma” dhe shpërndarësve të saj fiktivë, të lidhur me zyrtarë të Fondit.
Nga të dhënat e siguruara nga FSDKSH, Drejtoria e Tatimeve dhe kallëzuesi, rezultoi se “Pharma Plus” dhe “Medix Albania” kishin deklaruar sasi fiktive barnash, pa asnjë blerje reale – përkatësisht 2000 kuti “Foster” dhe 1107 kuti “Trimbow” nga “Pharma Plus”, dhe 4000 kuti “Foster” e 11 500 kuti “Trimbow” nga “Medix Albania”, me vlerë totale mbi 70 milionë lekë.
Prokuroria thotë se këto kontrata dhe inventarë janë miratuar nga zyrtarë të FSDKSH, duke përfshirë drejtorin e përgjithshëm Spartak Zekja, i cili ka nënshkruar marrëveshjen me “Pharma Plus”. Gjithashtu, punonjëset Romina Agalliu, Zade Mali dhe Esjana Gjishti janë dyshuar për falsifikim dokumentesh, pasi kanë verifikuar si ekzistuese sasi barnash që nuk gjendeshin fizikisht në magazina.
Në përfundim të hetimeve paraprake, u caktuan këto masa sigurie:
- Alba Zylfo – ndalim daljeje nga shteti dhe detyrim paraqitjeje;
- Jona Berberi – ndalim daljeje nga shteti dhe detyrim paraqitjeje;
- Lorela Ballabani – ndalim daljeje nga shteti dhe detyrim paraqitjeje;
- Frigul Milla – arrest në burg (shpallur në kërkim);
- Spartak Zekja – arrest në burg;
- Zade Mali – ndalim daljeje nga shteti dhe pezullim nga detyra publike;
- Esjana Gjishti – ndalim daljeje nga shteti dhe pezullim nga detyra publike;
- Romina Agalliu – detyrim për t’u paraqitur në policinë gjyqësore.
Sipas Prokurorisë, ekziston dyshimi i arsyeshëm se këta persona kanë kryer në bashkëpunim veprat penale të “Falsifikimit të dokumenteve” dhe “Fshehjes së të ardhurave”, me qëllim përfitimin e fondeve publike të rimbursimit të barnave në vlera të mëdha.
