Kryeministri Edi Rama i shoqëruar nga dy ministra të qeverisë së tij, priti të shtunën zëvendëskryeministrin e Emirateve të Bashkuara Arabe, Abdullah bin Zayed Al Nahyan. Al-Nahyan ka mbërritur në vendin tonë me jahtin e tij superluksoz “Opera”, i ankoruar në ujërat e Dhërmiut. Më pas, një skaf e ka dërguar atë në portin e resortit “Kep Merli” në Sarandë, i shoqëruar edhe nga mjetet lundruese të Policisë. Aty Al-Nahyan – i cili është djali i themeluesit të Emirateve të Bashkuara Arabe, Zayed bin Sultan Al Nahyan – është takuar me Ramën, ministren e Infrastrukturës dhe Energjisë, Belinda Balluku si dhe nga ministri i Mbrojtjes, Pirro Vengu.
Në foto shihet jahti i arabit në Porto Palermo, të cilit mesa duket i është vënë syri, pasi në këtë takim, sipas burimeve dyshohet se është diskutuar një marrëveshje për shfrytëzimin e një prej pronave më të rëndësishme ushtarake në bregdetin shqiptar. Ministri Pirro Vengu do të hartojë një projektvendim për heqjen e pronës nga zona ushtarake, projekt që më pas do t’i kalojë presidentit Bajram Begaj për miratim dhe më pas qeverisë për vendimmarrje.
Për realizimin e këtij procesi do të angazhohen, përveç ministrit të Mbrojtjes, edhe Belinda Balluku, Kumbaro dhe vetë Vengu si relatues. Burimet e brendshme brenda qeverisë tregojnë se kjo marrëveshje është një prej urdhrave të Ramës që po ngjallin shqetësim të madh. Stafi i ministrive përkatëse është i alarmuar për pasojat ligjore të këtij operacioni, duke evidentuar se një vendim i tillë mund të përbëjë shkelje të ligjit dhe interesave të shtetit shqiptar pasi mund të bëhen shumë kollaj objekt hetimi nga SPAK. Ndërkaq, nivelet më të larta të udhëheqjes janë në pritje të përfitimeve financiare, të cilat pritet të jenë shumë milionëshe.
Frika nga SPAK
Frika e tyre vjen nga dosjet që SPAK po heton pikërisht për aferat me pronat në ushtri. Kujtojmë se ish-komandanti i Forcës Detare, Artur Meçollaria ka publikuar të dhëna faktike dhe ligjore të disa pronave ushtarake të marinës shqiptare. Sipas tij, një sërë bazash detare strategjike në Shëngjin, Kepin e Palit, Pashaliman, Palermo dhe Porto Romano janë objekt hetimi nga SPAK për procedura të dyshimta të tjetërsimit, ndërtimit pa leje dhe dhënieje në përdorim privat.
• Baza detare e Shëngjinit nën sekuestro 66,4 ha dhe në hetim nga Prokuroria Lezhë.
• Baza detare e Shëngjinit në hetim nga SPAK për ndërtimin e godinës 4-katëshe (Dosja 109/2021).
• Baza detare e Shëngjinit nën hetim nga SPAK për procedurën e nxjerrjes nga Plani i Vendosjes dhe Përhapjes të vitit 2016 (Dosja 109/2021).
• Baza detare e Kepit të Palit nën hetim nga SPAK për procedurën e nxjerrjes nga Plani i Vendosjes dhe Përhapjes të vitit 2016 (Dosja 109/2021).
• Baza detare e Pahalimanit nën hetim nga SPAK për procedurën e nxjerrjes nga Plani i Vendosjes dhe Përhapjes të vitit 2016 (Dosja 109/2021).
• Baza detare e Palermos nën hetim nga SPAK për procedurën e nxjerrjes nga Plani i Vendosjes dhe Përhapjes të vitit 2016 (Dosja 109/2021).
• Prona nr. 219 në Porto Romano zaptuar nga Porti MBM prej tre vitesh dhe Ministri Vëngu nuk zbaton ligjin për lirimin e pronës. Nën hetim nga SPAK. (Dosja 108/2021).
