Një skandal i rëndë ka plasur brenda kompanisë së njohur “Megatek”, ku qindra punonjës denoncojnë atë që e quajnë një “skemë abuzive dhe çnjerëzore” me pagat e luftës.
Pas publikimeve të JOQ Albania, të tjera dëshmi tronditëse kanë mbërritur nga punonjës të revoltuar, të cilët tregojnë se kompania u ka kërkuar t’i kthejnë mbrapsht paratë e përfituara nga shteti gjatë pandemisë.
Sipas tyre, ndonëse nuk kanë bërë asnjë ditë pushim dhe kanë punuar me orë të zgjatura gjatë periudhës më të vështirë, kompania ka vendosur t’u mbajë pagat, duke i detyruar të zgjedhin: ose të kthejnë “pagën e luftës”, ose të mbeten pa rrogë deri në korrik.
“Na kanë shfrytëzuar në maksimum. Punonim pa orar, merrnim gjoba nga policia duke shkuar në punë dhe tani kërkojnë të na marrin edhe ndihmën që dha shteti”, shprehen punonjësit.
Por skandali nuk mbaron këtu. Një tjetër denoncues zbulon arrogancën e frikshme që, sipas tij, vjen direkt nga drejtuesit e kompanisë.
“Nuk më dëmtoni dot se kam shtetin në krah!” – pretendohet të ketë deklaruar pronari para punonjësve të revoltuar.
Sipas denoncimit, shumë punonjës rezultojnë pa siguracione dhe janë kërcënuar se paga e muajit do t’u jepet vetëm më 17 korrik, nëse nuk rikthejnë mbrapsht pagesën e luftës. Kjo tregon sa barbarisht sillet me punonjësit Dionis Teqja edhe pse kjo ngjarje ka disa vite që ka ndodhur. Por po e rikthejmë këtë ngjarje për të rikujtuar institucionet se asgjë nuk ka ndryshuar nga ajo kohë.
Një sjellje që ngre pikëpyetje të forta: si mundet një kompani e madhe të trajtojë punonjësit si skllevër modernë, ndërsa mburret se është e paprekshme nga shteti?
Nëse këto akuza rezultojnë të vërteta, kemi të bëjmë jo vetëm me një skandal moral, por me një akt të pastër shfrytëzimi dhe presioni ndaj qindra familjeve shqiptare që mbajnë mbi supe biznesin e kompanisë.
Institucionet heshtin, punonjësit kanë frikë, ndërsa “Megatek” vazhdon të sillet sikur ligji nuk ekziston.
