Duket se paraburgimi po sjell “valë sëmundjesh” në radhët e të arrestuarve të profilit të lartë. Pas Ilir Beqajt, që la zyrën për barelat e spitalit, radha i ka ardhur edhe Erion Veliajt.
Veliaj është dërguar paraditen e sotme në Spitalin e Durrësit, për shkak të problemeve me tensionin. Sipas raportimeve, Veliaj ka ndier shqetësime shëndetësore dhe mjekët kanë vendosur t’i kryejnë një sërë analizash për të vlerësuar gjendjen e tij.
Pas disa orësh qëndrimi nën kujdesin e mjekëve, Veliaj është rikthyer në qelinë e tij në paraburgim, ku thuhet se do të vijojë marrjen e trajtimit të nevojshëm.
Nga ana tjetër, për opinionin publik nuk është hera e parë që zyrtarët e lartë të përballur me drejtësinë kujtohen për tensionin apo për “lodhje fizike” në momentet më të papërshtatshme.
Ish-ministri i Shëndetësisë, Ilir Beqaj, ndodhet i shtruar në QSUT, pasi është paraqitur me urgjencë për shkak të një gjendjeje shëndetësore të rënduar
Beqaj është diagnostikuar me një infeksion të rëndë të lëkurës dhe temperaturë të lartë, ndërsa mjekët po ndjekin nga afër gjendjen e tij, e cila ende nuk është stabilizuar plotësisht.
