Nga goleador dhe protagonist absolut në suksesin e titullit kampion, në i padëshiruar. Kjo është përmbledhja e historikut të një viti e gjysmë të Viktor da Silvës me fanellën e Partizanit. Ditën e djeshme Partizani i befasoi të gjithë kur njoftoi ndarjen me mesfushorin e avancuar. Lajmi u bë i ditur përmes një njoftimi në rrjetet sociale.
“Faleminderit Viktor da Silva! Partizani zyrtarizon mbylljen e bashkëpunimit me Viktor da Silvën. Mesfushori 28-vjeçar dhe klubi kanë vendosur sot (dje) të ndërpresin me mirëkuptim kontratën mes tyre. Partizani dëshiron t’i shprehë mirënjohjen Viktor da Silvës për kontributin e dhënë me fanellën e kuqe, me të cilën u shpall edhe kampion i Shqipërisë. Kënaqësi që ishe pjesë e familjes sonë të madhe, Partizani”, shkruan klubi.
PRAPASKENAT – Megjithëse Partizani njofton se palët kanë vendosur bashkërisht të ndahen, burime për gazetën “Panorama Sport” bëjnë me dije se situata ka qenë ndryshe.
Da Silva të dielën ka qenë në stërvitje si zakonisht dhe në optikën e tij për të ardhmen dukej sikur e shihte veten te Partizani deri në fund të sezonit, pavarësisht se në javët e fundit i ishte dashur të qëndronte më së shumti në stol.
Megjithatë, brazilianit dje i është komunikuar se klubi dëshiron që të mbyllin kontratën. Ka qenë vetë drejtori Arbër Abilaliaj, i cili ka zgjedhur t’ia komunikojë mesfushorit lajmin me një mesazh në celular.
Ai i ka komunikuar Da Silvës se nuk është më në planet e klubit për të ardhmen. Kontrata e brazilianit skadonte në fund të sezonit, por i ndodhur në këto kushte, ai ka vendosur të mos kundërshtojë vendimin e klubit, por të arrijë një marrëveshje për zgjidhjen e kontratës.
Nga dje Da Silva është lojtar i lirë. Gazeta pyeti edhe në klub për të pasur një version të tyre dhe komunikimi ishte se palët janë ndarë me kërkesën e lojtarit dhe me mirëkuptimin e klubit, pra me marrëveshje dypalëshe.
MUAJT E FUNDIT – Da Silva ishte faktor kyç për Partizanin e vjetshëm dhe gëzon merita të mëdha për arritjen e titullit kampion. Me 13 gola të realizuar, ai ishte protagonisti më i rëndësishëm, veçanërisht pas largimit të Skukës. Por me ndërrimin e stafit dhe me ardhjen e Zekiçit si trajner dhe Abilaliajt si drejtor, braziliani kaloi në plan të dytë. Fillimisht erdhi ai dënim pas ndeshjes me Valmierën e më pas javë të tëra pa aktivizim, para se palët të ndaheshin 6 muaj para mbylljes së kontratës.
