Kompania e telekomunikacionit ONE Albania është kthyer në simbolin më të pastër të depërtimit të mafies ndërkombëtare në Shqipëri, përmes teknologjisë, manipulimit të tregut dhe abuzimeve me qytetarët. Pas saj qëndron një rrjet i strukturuar i interesave ruse, bullgare dhe hungareze, të lidhura ngushtë me oligarkë të sanksionuar të Vladimir Putinit dhe emra të botës së krimit ballkanik.
Mashtrimi i hapur ndaj qytetarëve shqiptarë
Prej më shumë se një muaji, qindra abonentë të ONE Albania kanë denoncuar në rrjetet sociale se interneti në telefon nuk funksionon, pavarësisht se paguajnë për paketa “pa limit”, si Ultra150. Ankesa të pafundme kalojnë nga një “departament fantazëm”, i cili nuk ofron asnjë zgjidhje reale.
Kjo skemë mashtrimi menaxhohet nga kompani satelitë me lidhje direkte në Rusi, si “Limited Company IT Prospekt” dhe platforma “Chat2Desk”, që operon nga Shën Petersburgu, në adresën: 9 ulica Raynochinnaya, office 306, Saint Petersburg, Russian Federation.
Zhvatje sistematike përmes kontratave dhe bllokadave
Qindra klientë me kontrata mujore prej 18 mijë lekësh po përballen me të njëjtën situatë – pagesë pa shërbim. One Albania, ndërsa reklamon shërbim cilësor, nuk zbaton detyrimet kontraktuale, por përdor klauzola të fshehta, mashtrime teknike dhe ndërpret shërbimet sipas dëshirës, duke zbatuar një model mafioz të zhvatjes në masë.
Skandali i të dhënave të vjedhura dhe heshtja kriminale
Në vitin 2023, grupi Homeland Justice publikoi një sulm kibernetik ndaj serverave të ONE Albania, duke ekspozuar të dhënat personale të mijëra abonentëve. Kompania nuk raportoi publikisht këtë sulm dhe heshti për vjedhjet e tjera të përsëritura, duke shtuar dyshimet për bashkëpunim me rrjete kriminale bullgare dhe ruse për shqitjen e të dhënave personale.
Prapaskena politike-financiare: Oligarkët e Putinit në Tiranë
Pas ONE Albania qëndron një zinxhir kompanish dhe individësh të përfshirë në pastrim parash, afera korruptive dhe lidhje me shërbimet sekrete lindore. Në krye të këtij rrjeti është hungarezi Gellért Zoltán Jászai, ortak i ngushtë i kryeministrit Viktor Orbán dhe prestnomë i oligarkëve të Putinit. Jászai është i skeduar për afera financiare në të paktën 10 shtete, përfshirë Shqipërinë.
Nga mafia bullgare te kontrolli hungarez: një skemë ndërkombëtare
Fillimisht, kompania Telekom Albania (ish-AMC), ishte në pronësi të grupit greko-gjerman OTE, por në vitin 2019 u shkëmbye për vetëm 50 milionë euro me kompaninë Albania Telecom Invest AD, në pronësi të bullgarit Spas Roussev dhe shqiptaro-bullgarit Elvin Guri. Në atë kohë, Telekom kishte fitime të pashpërndara prej 352 milionë eurosh. Pra, u ble për një fraksion të vlerës reale.
Kush janë Spas Roussev dhe Elvin Guri?
- Spas Roussev është një nga figurat më të errëta të biznesit bullgar, me lidhje të forta me krimin e organizuar, mafien dhe njerëz të rrethit të ngushtë të Vladimir Putinit. Ai është shfaqur në jaht në Monako me Ivan Todorov, trafikant famëkeq droge dhe armësh.
- Elvin Guri, ortaku i tij, ka lidhje të shumta me grupe financiare të dyshimta dhe është përmendur për ndikim në vendimmarrje strategjike të operatorit.
Nga Monako në Tiranë: Mafia që vendos rregullat e tregut
Në vitin 2003, pas një tentative për vrasjen e Todorovit, në makinën e tij u gjet një foto që e lidhte Roussevin me figurat më të rrezikshme të mafies bullgare. Këta emra, që luheshin në jahtet e luksit dhe korridoret e pushtetit të Sofjes, sot vendosin tarifat e internetit dhe fatin e të dhënave të shqiptarëve.
Kalimi te hungarezi Jászai: një përballje me strukturat e NATO-s
Në mars të vitit 2022, kompania hungareze 4iG, e kontrolluar nga Gellért Zoltán Jászai, mori zyrtarisht kontrollin e One Albania, duke blerë 100% të aksioneve të Albania Telecom Invest AD. 4iG është tashmë krahu teknologjik i interesave hungarezo-ruse në Ballkan dhe në Shqipëri, një kërcënim i drejtpërdrejtë për sigurinë kibernetike kombëtare dhe integritetin e të dhënave të qytetarëve.
Pse autoritetet shqiptare lejojnë këtë kompani të operojë lirshëm? Pse nuk vepron AKEP për bllokimin e një operatori që manipulon tregun? Pse Prokuroria nuk nis hetime për lidhje të dyshimta me krimin e organizuar dhe për vjedhje të të dhënave? A është Shqipëria kthyer në bazë logjistike për interesat e Putinit në Ballkan përmes një kompanie telefonike?
