Qeveria e Koresë së Veriut po zbaton gjithnjë e më shumë dënimin me vdekje, përfshirë edhe për njerëzit që kapen duke parë dhe shpërndarë filma dhe drama televizive të huaja, sipas një raporti të rëndësishëm të OKB-së.
Diktatura e Kim Jong Un, e cila mbetet kryesisht e izoluar nga bota, po i nënshtron njerëzit e saj më shumë punës së detyruar, ndërsa kufizon më tej liritë e tyre, informon BBC.
Zyra e OKB-së për të Drejtat e Njeriut zbuloi se gjatë dekadës së fundit shteti i Koresë së Veriut kishte shtrënguar kontrollin mbi “të gjitha aspektet e jetës së qytetarëve”.
“Asnjë popullsi tjetër nuk është nën kufizime të tilla në botën e sotme”, përfundoi raporti, duke shtuar se mbikëqyrja ishte bërë “më e përhapur”, e ndihmuar pjesërisht nga përparimet në teknologji.
Komisioneri i Lartë i OKB-së për të Drejtat e Njeriut, Volker Türk, tha se nëse kjo situatë vazhdon, koreano-veriorët “do t’i nënshtrohen më shumë vuajtjeve, shtypjes brutale dhe frikës që kanë duruar për kaq gjatë”.
Raporti, i cili bazohet në më shumë se 300 intervista me njerëz që janë arratisur nga Koreja e Veriut në 10 vitet e fundit, zbuloi se dënimi me vdekje po përdoret më shpesh.
Të paktën gjashtë ligje të reja janë futur që nga viti 2015 që lejojnë dhënien e dënimit. Një krim që tani mud të dënohet me vdekje është shikimi dhe ndarja e përmbajtjes së mediave të huaja, siç janë filmat dhe dramat televizive, ndërsa Kim Jong Un punon për të kufizuar me sukses aksesin e njerëzve në informacion.
Të arratisurit u thanë studiuesve të OKB-së se që nga viti 2020 e tutje ka pasur më shumë ekzekutime për shpërndarjen e përmbajtjes së huaj. Ata përshkruan se si këto ekzekutime kryhen nga skuadrat e pushkatimit në publik për të ngjallur frikë tek njerëzit dhe për t’i dekurajuar ata që të shkelin ligjin.
Kang Gyuri, e cila u arratis në vitin 2023, i tha BBC-së se tre nga shoqet e saj u ekzekutuan pasi u kapën me përmbajtje koreano-jugore. Ajo ishte në gjyqin e një shoqeje 23-vjeçare, e cila u dënua me vdekje.
“Ai u gjykua së bashku me kriminelë të drogës. Këto krime trajtohen njësoj tani”, tha ajo, duke shtuar se që nga viti 2020 njerëzit ishin bërë më të frikësuar.
