Ambasada e Shteteve të Bashkuara në Tiranë ka publikuar një mesazh zyrtar me rëndësi të veçantë për të gjithë qytetarët shqiptarë që kanë kontrolluar statusin e tyre në programin e Lotarisë Amerikane (DV Lottery).
Në njoftim theksohet se, në rast përzgjedhjeje, vetëm udhëzimet e publikuara në faqen zyrtare www.dvprogram.state.gov janë të vlefshme dhe aplikantët duhet t’i ndjekin ato me kujdes. Të gjitha formularët dhe informacionet duhet të plotësohen në mënyrë elektronike, në përputhje me kërkesat e Departamentit Amerikan të Shtetit.
Ambasada sqaron gjithashtu se përzgjedhja në lotari nuk garanton automatikisht vizë apo thirrje për intervistë. Të gjithë aplikantët e përzgjedhur duhet të kalojnë verifikimet e sigurisë, kontrollin e dokumentacionit dhe të plotësojnë me saktësi të gjitha të dhënat personale.
“Vetëm udhëzimet në faqen zyrtare janë të vlefshme. Ndjekja e saktë e hapave është thelbësore për të vijuar më tej në procesin e intervistës,” – thuhet në deklaratën e Ambasadës.
Ambasada i bën thirrje qytetarëve që të mos bien pre e mashtrimeve, agjencive apo individëve që premtojnë “vizë të garantuar”, pasi askush nuk mund të ndikojë në përzgjedhjen apo përfundimin e këtij procesi.
Ky njoftim vjen në një kohë kur interesimi për Lotarinë Amerikane mbetet shumë i lartë në Shqipëri, dhe ku gjithnjë e më shumë raste mashtrimi janë raportuar nga aplikantët.
