Vota e anëtarit të Këshillit Bashkiak të Tiranë, Agim Kraja është e shtrenjtë. Prej dekadash, pronari i kompanisë “Xhast SHPK” e ka kthyer velën me shkathtësi andej nga fryn era dhe është tashmë një faktor duke marrë koncesione, HEC-e, leje dhe pjesë të parave nga prokurimet publike. Ishte me LSI-në pastaj kaloi me Veliajn, më pas me Ramën.
Qëndrimet e tij politike janë reflektuar në favorizimet e vazhdueshme që i janë bërë nga zyrtarët e tenderave nëpër bashki. Së fundmi, Kraja është shpërblyer nga kryebashkiaku i Kamzës, Rakip Suli, me një tender shumë të madh.
Objekti i Tenderit është “Ndërtim Rrugët Blloku 2 Bathore 6-7” me fond limt 89 145 761,00 lekë pa TVSH. Nuk ka asnjë mëdyshje, për t’ia dhënë tenderin njeriut të familjes së “Rilindjes”.
Në tenderin e mbajtur më 25 gusht 2025 janë përjashtuar nga gara të gjithë pjesëmarrësit që të fitonte kompania e këshilltarit bashkiak. “Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, ky është klasifikimi që i bën tenderit Open Data Albania. Theksojmë se procedura është shënuar me “Flamur të kuq”, që tregon riskun e korrupsionit.
Më 15 shtator 2025, një nga nënkryetarët e bashkisë, me urdhër dhe delegim nga Rakip Suli, ka firmosur formularin e shpalljes së fituesit. Bashkimi i operatorëve “APIS CONSTRUCTION” shpk 9.37 % & ILIRIA/D 9.72 % & XHAST SHPK : 80.91 %, me dy subjekte mbështetës do të marrë kontratën e tenderit me ofertën 83,633,677.45 lekë pa TVSH.
Kriteri i shpallur organizatorët e tenderit për fituesin ishte “oferta ekonomikisht më e favorshme bazuar në çmim”. Por kjo nuk funksionon kur ka korrupsion politik. Kompania e Agim Krajës fitoi megjithëse kishte ofertë me vlerë më e lartë nga propozimet e firmave të tjera pjesëmarrëse.
Konkretisht, bashkimi i operatorëve ekonomikë “KUPA” shpk & “SELAMI” shpk & “STERKAJ” shpk ofroi ta bënte këtë punë me 72,913,296.50 lekë pa tvsh.
Bashkimi tjetër “L.T.E CONSTRUCTION” shpk & “VARAKU E” shpk bëri ofertën 69,684,077.31 lekë pa tvsh.
Po ashtu, dy kompanitë “K.TURJA” shpk & “MELA” shpk bënë ofertën 71,223,899 lekë pa tvsh.
Duke e parë se paratë e tenderit për rrugicat e Bathores kanë shkuar në duart e biznesmenit Agim Kraja, shqetësohemi se nuk pritet punë me cilësi dhe në afat nga kompania e tij.
“Xhast shpk” ka hyrën listën e Kontrollit të Lartë të Shtetit si subjekt që merr pagea për punë të pakryera.
Në një raport të kohëve të fundit të KLSH, për veprimtarinë e Bashkisë Elbasan, përfshihet edhe konkluzioni i auditimit të procedurës tenderuese me objekt ‘ndërtim rrjeti KUZ në zonat informale’. Sipas KLSH-së, kompanitë e Agim Krajës dhe Hajredin Ukperajt kanë mashtruar me zbatimin e kontratës, duke falsifikuar volumin e punimeve dhe u janë certifikuar punime të pakryera.
KLSH-ja i ka kërkuar Bashkisë Elbasan që të ndjekë procedurat ligjore, duke detyruar dy kompanitë të kthejnë në buxhet paratë e vjedhura publike.
Biznesmeni Agim Kraja është klient i vjetër i Rakip Sulit. Edhe në vitin 2022, Suli i dha kësaj kompanie tenderin 120 milionë lekë për një rrugë në Paskuqan, e cila sot është e amortizuar.
Kujtojmë se Kryetari i bashkisë Kamëz, Rakip Suli, është paraqitur dy herë në SPAK në nëntor 2023. SPAK po kryen hetime për veprat “Ushtrim i ndikimit të paligjshëm”, “shpërdorim detyre”, “shkelje e barazisë në tendera” dhe korrupsion, pas kallëzimit të banorëve të Kamzës.
Rakip Suli është denoncuar edhe nga një grup këshilltarësh të bashkisë Kamëz, duke iu referuar raportit të KLSH-së pas kontrollit në këtë institucion.
Burime bëjnë me dije se SPAK po kryen hetime për zyrtarë të bashkisë Kamëz, lidhur tendera të pastrimit të qytetit dhe dëmshpërblimet për tërmetin. Pas kallëzimeve të mbërritura në strukturën antikorrupsion, ky institucion ka regjistruar procedim penal, ndërsa hetimet po kryhen nga prokurori Elvin Gokaj. Mësohet se për këtë çështje janë thirrur dhe janë marrë në pyetje disa drejtorë të këtij institucioni dhe janë sekuestruar dokumente nga bashkia.
Kallëzimi i fundit në SPAK për Sulin është bërë në prill 2025 për “shpërdorim detyre”.
