Skandali i AKSHI-t duket se nuk ka ndalur funksionimin e mekanizmit që për vite me radhë ka shoqëruar shpërndarjen e fondeve publike në sektorin e teknologjisë.
Ndërsa hetimet janë në kulmin e tyre dhe disa nga figurat kryesore të dosjes janë në arrati apo nën masa sigurie, biznesi me tenderët vijon pothuajse pa asnjë ndërprerje.
Largimi i Ermal Beqirit nga skena publike, pas shpalljes në kërkim nga SPAK, nuk duket se ka krijuar vakum në praktikën e shpërndarjes së tenderëve të AKSHI-t.
Përkundrazi, në vend të tij është rikthyer në qendër të vëmendjes Gerond Meçe, përmes kompanisë Advanced Business Solutions, e cila gjatë javëve kur skandali i AKSHI-t ishte në kulmin e ekspozimit publik ka nisur sërish të fitojë tenderë nga ky institucion.
Sipas të dhënave të Agjencisë së Prokurimeve Publike, Advanced Business Solutions ka fituar së fundmi një kontratë me vlerë rreth 500 mijë euro nga AKSHI për sistemin e kontrollit të hyrje-daljeve në burgje.
Ky tender është veçanërisht domethënës, pasi kompania e Meçes ka mundur në garë një subjekt që e kishte mbajtur këtë kontratë prej vitesh, pavarësisht problematikave dhe skandaleve që kanë shoqëruar historikisht zbatimin e këtij shërbimi në institucionet penitenciare.
Fakti që një kompani e lidhur me rrethin e aktorëve të dosjes AKSHI rikthehet si fituese pikërisht në momentin kur hetimet janë intensifikuar, ngre pikëpyetje serioze mbi realitetin e ndryshimeve në mënyrën se si funksionon ky institucion.
Në dukje, aktorët ndryshojnë, por skema duket se mbetet e njëjtë.
Dosja e AKSHI-t ka zbuluar një model të përsëritur ku fondet publike përfitoheshin përmes manipulimit të procedurave, kufizimit të garës dhe fryrjes së fondit limit.
Ky model nuk duket se është çmontuar. Beqiri është nxjerrë nga skena, por roli i tij në mekanizëm është zëvendësuar, ndërsa rrjedha e parave publike vijon.
Në këtë panoramë, metafora e spektaklit nuk është e rastësishme.
Çdo spektakël ka aktorë, regjisorë dhe mbi të gjitha një producent.
Sipas dosjes hetimore, aktorët e skemës së AKSHI-t kanë qenë figura si Ermal Beqiri dhe Gerond Meçe, ndërsa roli i regjisorit i atribuohet Ergys Agasit, i dyshuar si koordinatori i përgjithshëm i operacionit.
Por nëse spektakli i zhvatjes vazhdon edhe pas largimit të disa aktorëve dhe ekspozimit të regjisorit, pyetja që mbetet pa përgjigje është se kush është producenti.
Kush është ai që garanton vazhdimësinë e skemës, pavarësisht arrestimeve, hetimeve dhe zhurmës publike.
Dhe nëse regjisori i vjetër vijon të ketë rol në prapaskenë, apo nëse tashmë loja drejtohet nga një producent që vepron në hije, pa u ekspozuar, ndërsa aktorët ndërrohen sipas nevojës? /skyweb.al
