Gjendet trupi i pajetë i fëmijës së dytë, që dyshohet se u hodhën në lumin Buna bashkë me të ëmën. Pas dy ditësh kërkime, është gjetur edhe trupi i pajetë i vajzës tjetër të familjes Arrazi.
E mitura 8 vjeçare është gjetur në orët e pasdites, pas kërkimeve intensive nga RENEA.
Kujtojmë që mbrëmjen e të shtunës u gjet trupi i vajzës së madhe Ergysa Arrazi 9 vjeç e cila u përcoll sot për në banesën e fundit. Ndërkohë që kërkimet po vijojnë për të gjetur trupat e nënës dhe djalit 3 vjeçar.
Ngjarja
Katër pjesëtarë të një familje me banim në qytetin e Shkodrës; nëna 39-vjeçare Alma Arrazi bashkë dhe tre fëmijët e saj të moshës 9, 8 dhe 3 vjeç, dyshohet se janë vetëmbytur në ujrat e Lumit Buna, njoftoi policia një ditë më parë. Sipas bluve, “hetimet e thelluara kanë zbardhur një rast të dhunës në familje, që ka shkaktuar vetëvrasje”.
Dyshimet e para lindën pas gjetjes së trupit të pajetë të vajzës 9-vjeçare nga një peshkatar, për të cilën policia konfirmoi në mesditë se, “nga kqyrja paraprake në prani të ekspertëve mjeko-ligjor, nuk janë konstatuar shenja dhune”.
Ndërkohë, një grup hetimor po merr në pyetje të afërm të familjes Arrazi, për të zbardhur rrethanat e ngjarjes, e cila cilësohet si më e rënda që ka ndodhur vitet e fundit brenda familjes.
Nëna e fëmijëve është larguar nga banesa bashkë me tre fëmijët e saj më datën 2 maj dhe policia dyshon se shkak është bërë dhuna e ushtruar nga bashkëshorti, i identifikuar si 31 vjeçari me emrin Ergys Arrazi.
Policia e Shkodrës u vu në lëvizje për gjetjen e nënës dhe tre fëmijëve pas kallzimit të bërë një ditë më pas, me 3 maj, nga bashkëshorti dhe baba i fëmijëve. 31-vjeçari Arrazi, është ndaluar tashmë nga policia me akuzën e “shkaktimit të vetëvrasjes si pasojë e dhunës së ushtruar”.
Ndërkohë, familjarë të këtij të fundit mohojnë akuzat për dhunë në familje.
