Zgjerohen hetimet për ndërtimet pa leje në Sarandë dhe Ksamil. Prokuroria e Sarandës ka lëshuar 12 masa sigurimi ndaj efektivëve të policisë, zyrtarëve vendorë dhe biznesmenëve, të dyshuar për shpërdorim detyre, mosveprim ndaj paligjshmërisë dhe ndërtime pa leje.
Aksioni lidhet me hetimet e nisura pas ndërhyrjes së AMP-së në muajin maj, ku u arrestua edhe ish-shefi i Komisariatit të Policisë Sarandë, Gëzim Bashllari, bashkë me disa efektivë të tjerë, nën dyshimet se kishin favorizuar ose toleruar ndërtime të paligjshme në zonat bregdetare të Sarandës dhe Ksamilit.
Sipas Prokurorisë, masat e reja janë dhënë në kuadër të procedimit penal nr.304 të vitit 2026 dhe përfshijnë punonjës të Komisariatit të Policisë Sarandë, zyrtarë të Inspektoratit Vendor të Mbrojtjes së Territorit dhe biznesmenë të ndërtimit.
Deri tani janë ekzekutuar katër masa sigurimi:
B.T., ish-shef i Seksionit të Krimeve në Volum në Komisariatin e Sarandës, është lënë në “arrest shtëpie” për shpërdorim detyre;
K.S. dhe K.SH., të dy inspektorë policie në Sarandë, janë arrestuar me burg për të njëjtën vepër penale;
A.P., pronar i Hotel Oasis, është arrestuar për ndërtim të paligjshëm.
Sipas hetimeve, efektivët dyshohet se nuk kanë marrë masa për të ndalur ndërtimet pa leje në zonat turistike të jugut.
Hetimet nisën pas evidentimit të disa ndërtimeve të paligjshme në plazhe dhe struktura turistike në Sarandë e Ksamil, mes tyre edhe rasti i një objekti të ngritur në zonën bregdetare të njohur si “Coppa Cabana”, ku u arrestuan disa punëtorë dhe u shpallën në kërkim persona të lidhur me ndërtimin.
