Ka zgjatur për më shumë se 8 orë seanca e marrjes në pyetje në SPAK ndaj ish-ministrit të Shëndetësisë, Ilir Beqaj, ndaj të cilit krahas çështjes së sterilizimit, po kryhet edhe një hetim financiar mbi pasurinë e tij.
Beqaj ka hyrë në godinën e SPAK rreth orës 09:00 të paradites së sotme dhe ka dalë rreth orës 17:30, ndërsa në një prononcim të shkurtër për mediat tha se i është komunikuar që sendet personale do të vijojnë të mbeten të sekuestruara.
Beqaj ka pohuar se hetimet që po kryhen SPAK vijojnë të jenë shumë të ngushta, ndërsa ai është marrë në pyetje lidhur me koncensionin e sterilizimit.
Beqaj pretendon se hetimet e SPAK nuk janë të plota, duke kërkuar që ato të shtrihen nga viti 2011 deri në 2013-ën, kohë kur socialistët kanë ardhur në pushtet dhe ai është emëruar në krye të Ministrisë së Shëndetësisë.
“Gjithashtu besoj se hetimet, janë ende shumë të ngushta. Duhet të shtrihen në dy pjesë dhe tashmë janë bërë tetë vjet nga zbatimi i kontratës për të provuar përfitimet. Sot avokatët më kanë premtuar se do të më kthejnë pajisjet elektronike”, tha Beqaj.
Ndërkohë për koncensionin e sterilizimit ndodhen në burg Klodian Rrjepaj, ish-zv.ministër i Shëndetësisë dhe biznesmeni Ilir Rrapaj.
