Nga Etleva Merko
Edhe këtë verë, në vend që të përjetonim “bumin e shumëpritur” turistik që do të përkthehej në rritje të ndjeshme të të ardhurave për ekonominë vendase, jemi dëshmitarë të një “bumi” krejt tjetër: spastrim masiv i drejtuesve të bashkive, me urdhër të prerë nga vetë kryeministri.
Një akt që përbën ndërhyrje flagrante në kompetencat e pushtetit vendor, të garantuara me Kushtetutë dhe me ligjin nr. 139/2015 “Për vetëqeverisjen vendore”.
Në të njëjtën kohë, po nga i njëjti burim vjen edhe një aksion tjetër “i fortë”: lirimi i hapësirave publike përgjatë gjithë vijës bregdetare, nën pretekstin e rikthimit të ligjshmërisë.
Deri këtu, gjithçka do të dukej sikur më në fund shteti po vepron, por çuditërisht kjo ndodh vetëm pas zgjedhjeve dhe pikërisht në kulmin e sezonit turistik.
Ironia arrin kulmin në Theth, aty ku, vetëm një vit më parë, shteti u bënte sytë qorr ndërtimit të bizneseve “pa leje” për të nxitur turizmin dhe ekonominë lokale.
Sot, të njëjtat struktura po shemben, me policinë që ngjan më shumë si trup ndërhyrës sesa si mbrojtëse e rendit. Banorët, që investuan me shpresë, tani përballen me rrënim të pronës, dhunë psikologjike dhe mungesë totale të garancisë ligjore.
Kujtojmë se në vitin 2023 Shqipëria pati mbi 10 milionë turistë të huaj (sipas INSTAT ). Por ky sezon, i cili duhet të ishte trampolinë për të tejkaluar këtë arritje, po shndërrohet në një sezon kaosi institucional dhe goditjesh selektive.
Përse nuk u kryen këto ndërhyrje gjatë katër viteve të plota të mandatit? Përse tani? Strategji politike? Lajthitje e rastësishme? Show mediatik? Demonstrim force? Tallje me qytetarët? Apo hakmarrje?
Ndoshta të gjitha bashkë sepse kur ke pushtet absolut, nuk ke nevojë për logjikë, argument apo ligj. Thjesht thua: “Unë di gjithçka dhe do të bëj çfarë të dua.”
