Nëse SPAK ka vullnet për të luftuar pastrimin e parave në Tiranë dhe bregdet, mjafton të caktojë një prokuror të posaçëm, i cili të mbajë shënim dhe të verifikojë bizneset që reklamon Blendi Fevziu në pjesën e fundit të emisionit Opinion.
Nga një verifikim që kemi kryer për bizneset e reklamuara gjatë vitit të fundit, ku përfshihen hotele, kulla, resorte, showroom-e, restorante, bujtina, dyqane etj., rreth 70 % e tyre, janë produkt i investimit të parave të pista, kryerisht të trafikut të drogës, por edhe të korrupsionit, kontrabandës, skemave mashtruese etj., nga personazhe që janë subjekte të ligjit anti-mafia.
Për shembull, në 9 maj të këtij viti, gazetari Fevziu ia kushtoi pjesën e fundit të emisionit Opinion (rreth 20 minuta) showroom-it më të ri me makina elektrike të Auto Flux Fusion tek kullat e Bashkim Ulajt pranë Liqenit Artificial në Tiranë, duke e prezantuar Flux Fusion një lider në tregun e makinave elektrike në Shqipëri.
Një dosje e autoriteteve gjermane tregon se pas këtij investimi dhjetëra milionë euro qëndron linja më e fuqishme e trafikut dhe e shpërndarjes së kokainës dhe heroinës në Gjermani.
(Ferdinant Sporeja)
Administrator i Flux Fusion është Ferdinant Sporeja, i cili vite më parë është shpallur në kërkim nga policia me urdhër të Prokurorisë së Tiranës për shitjen e testit me përgjigjet e sakta të konkursit të parë në Fakultetit të Drejtësisë.
Ferdinant Sporeja është mbulesë e një prej organizatave më të fuqishme të trafikut të kokainës dhe heroinës në Gjermani, me në krye Fiqiret Dedën nga Kavaja, i dënuar me 20 vite burg nga autoritetet gjermane dhe me 11 vite burg në mungesë nga Gjykata për Krimet e Rënda në Shqipëri.
(Fiqiret Deda)
Nga përgjimet dhe zbërthimi i telefonave anëtarët e grupit përdornin shpesh kodin ‘pëllumbi’ dhe ‘ndeshja’ duke iu referuar kokainës, ndërsa qendrën e kishte në qytetin e Regensburgut në Gjermani.
Grupi i Fiqiret Dedës, i goditur nga drejtësia gjermane, por që drejtësinë shqiptare e peshon me lekë, qëndron pas lulëzimit të befasishëm të biznesit të ri të makinave elektrike, një investim që, siç edhe reklamohet, arrin në dhjetëra milionë euro.
Ky investim me para që dyshohet se kanë si burim aktivitetin kriminal, kamuflohet me një kompani fantazmë, pa bilance, pa kapital dhe pa historik aktiviteti, por thjeshtë shërben si tubacion i thasëve me para të trafikut ndërkombëtar të drogës. Kompania ndryshon herë pas hera emrin dhe vendndodhjen.
Dosja gjermane, një dosje në arkivat e SPAK dhe disa investigime tregojnë se në fakt bosi i madh që koordinon trafikun e kokainës në disa shtete me serbe dhe hungareze, që është pronari i vërtetë i sallonëve të makinave dhe që pastron paratë në Tiranë, nuk është as Feqiret Deda dhe as Ferdinant Sporeja, por një tjetër Spore me disa emra, ku nuk dihet se cili është i vërteti.
I prangosur me kërkesë të gjermanëve sapo zbriti nga avioni në Rinas në vitin 2017, bosi i Flux Fusion i mbylli shpejt llogaritë me drejtësinë, duke u kthyer pothuajse në një fantazmë.
/Prapaskena/
