Deputetja e Partisë Demokratike, Ledina Alolli, ka reaguar pas protestës së zhvilluar sot, duke dënuar dhunën e ushtruar ndaj qytetarëve dhe duke e cilësuar atë si tregues të frikës së pushtetit.
Në një reagim publik, Alolli u shpreh se mes protestuesve të dhunuar kishte edhe shumë të rinj, të cilët, sipas saj, kishin dalë për të ushtruar të drejtën e tyre kushtetuese për të protestuar.
“Kur qytetarët ngrejnë zërin, pushteti ngre shkopin. Kjo nuk është shenjë force. Është shenja më e qartë e frikës”, deklaroi deputetja demokrate.
Ajo kritikoi gjithashtu mungesën e Kryeministrit përballë qytetarëve gjatë protestës, ndërsa kërkoi lirimin e menjëhershëm të të gjithë personave të shoqëruar nga policia dhe respektimin e plotë të së drejtës kushtetuese për të protestuar.
Në përfundim të reagimit të saj, Alolli theksoi se “dhuna nuk e ndal ndryshimin, por vetëm e bën atë të pashmangshëm”.
