Kryetari i Vetëvendosjes, Albin Kurti, dhe kreu i LDK-së, Lumir Abdixhiku, kanë arritur dakordësinë për emrin që do të propozohet për Presidentin e ri të Kosovës.
Pas takimeve dhe diskutimeve mes dy liderëve, emri i përzgjedhur është ai i Profesor Doktor Bekim Sejdiut.
Lajmin e ka bërë të ditur Abdixhiku, i cili tha se negociatat mes dy palëve kanë qenë intensive dhe janë zhvilluar me synimin për të gjetur një figurë që mund të ketë mbështetje të gjerë.
“Kemi pasur takime të gjata, me diskutime të vazhdueshme dhe mjaft intensive. Të dyja palët kemi qenë të përkushtuar që të përcaktohemi për një emër konsensual për Presidentin e Republikës së Kosovës. Gjatë diskutimeve janë përmendur shumë emra personalitetesh të shquara që kanë mbështetje edhe në popull, edhe në shumë vende të Kosovës, që kanë dhënë kontribut profesional dhe kombëtar në shoqërinë tonë dhe që kanë vlera demokratike e shtetërore. Nga të gjithë emrat që janë propozuar e shqyrtuar, në mesin e të cilëve të gjithë ishin individë të dalluar, gjatë diskutimeve të përbashkëta jemi dakorduar për një emër dhe ai është Profesor Doktor Bekim Sejdiu. Karriera e Profesor Doktor Sejdiut është e shquar dhe e pasur, me përvojë të ndryshme e pozita të rëndësishme“, tha Abdixhiku.
