Ndërsa ministri i Drejtësisë, Toni Gogu, deklaronte se drejtësia nuk fillon në sallën e gjyqit, por në auditorët e Shkollës së Magjistraturës, Shqipëria po përballej me një tjetër ngjarje tragjike që vuri në pikëpyetje funksionimin e institucioneve dhe sigurinë e vetë atyre që kanë detyrën të zbatojnë ligjin.
Në të njëjtën ditë kur qeveria promovonte sukseset e reformës në drejtësi dhe fliste për konsolidimin e institucioneve, një efektiv policie humbi jetën gjatë një operacioni në Korçë, ndërsa një tjetër mbeti i plagosur rëndë.
Ngjarja rikthen në fokus jo vetëm sigurinë publike, por edhe kushtet në të cilat punon Policia e Shtetit, organizimin e operacioneve dhe përgjegjësinë për dështimet që kushtojnë jetë njerëzish.
“Drejtësia fillon në auditor”
Në Konferencën Përmbyllëse të Projektit të Binjakëzimit për forcimin e Shkollës së Magjistraturës, ministri Toni Gogu argumentoi se reforma në drejtësi ka hyrë në një etapë të re.
Sipas tij, pas ngritjes së institucioneve të reja, sfida tashmë është krijimi i një kulture profesionale dhe etike që do të garantojë funksionimin e sistemit.
“Ku fillon drejtësia? Shumë do të thoshin në sallën e gjyqit. Të tjerë në Kushtetutë. Por drejtësia fillon shumë më herët: në auditorin ku formohet gjyqtari i ardhshëm dhe në klasën ku trajnohet prokurori i ardhshëm”, deklaroi ministri.
Gogu e lidhi këtë proces me avancimin e Shqipërisë në rrugën europiane dhe me vlerësimet e marra nga partnerët ndërkombëtarë për ecurinë e reformës në drejtësi.
Kur shteti humbet një efektiv në krye të detyrës
Vrasja e efektivit, Enea Mekolli, gjatë një operacioni për kapjen e një personi të shumëkërkuar, tronditi vendin dhe ngriti një sërë pyetjesh.
Si u organizua operacioni?
A ishte vlerësuar niveli i rrezikshmërisë së personit që kërkohej?
Pse në operacion u përfshinë efektivë që, nuk ishin struktura më e përshtatshme për neutralizimin e një personi me rrezikshmëri të lartë?
Këto pyetje dominuan debatin në Kuvend sot , ku opozita kërkoi llogari nga ministri i Brendshëm, Besfort Lamallari.
Lamallari largohet nga Kuvendi
Në vend që t’i përgjigjej kritikave dhe pyetjeve të deputetëve, ministri i Brendshëm zgjodhi të largohej nga seanca parlamentare.
Lamallari argumentoi se po ndiqte nga afër gjendjen e efektivit të plagosur dhe se duhej të ishte pranë strukturave policore e mjekësore.
“Po komunikoja me drejtorin e Policisë së Shtetit dhe më njoftoi se polici është jashtë rrezikut për jetën. Do të merren masat dhe do të hetohet e gjithë ngjarja. Doja të isha këtu i pranishëm në respektin tuaj, por më mirë po largohem që të jem atje”, tha ai.
Megjithatë, opozita e interpretoi largimin si shmangie të llogaridhënies politike për një ngjarje që i ka kushtuar jetën një efektivi policie.
Debati për kushtet e Policisë
Ngjarja riktheu në vëmendje një problem të hershëm: kushtet në të cilat punojnë efektivët e Policisë së Shtetit.
Vdekja e Enea Mekollit nuk shihet vetëm si një akt kriminal i një personi të armatosur, por edhe si një rast që duhet të analizojë nëse shteti po i mbron mjaftueshëm ata që mbrojnë qytetarët.
Pikërisht këtu lind kontrasti me deklaratat e ministrit Gogu për forcimin e institucioneve. Sepse besimi te shteti nuk ndërtohet vetëm me gjyqtarë dhe prokurorë të mirëtrajnuar, por edhe me policë të mbrojtur, të pajisur dhe të mbështetur në terren.
Kryepolici premton hetim të plotë
Pas ngjarjes, drejtori i Policisë së Shtetit, Skënder Hita, vizitoi në Spitalin e Traumës efektivin e plagosur Edison Adri, raporton Politiko.al.
Në një deklaratë publike, Hita e cilësoi humbjen e Enea Mekollit si një plagë të rëndë për Policinë e Shtetit.
“Humbëm një koleg të mrekullueshëm, një baba, një familjar të përkushtuar dhe Policia e Shtetit humbi shërbëtorin e saj në shërbim të qytetarëve”, tha ai.
Kryepolici bëri të ditur se autori i dyshuar, Violand Braçellari, ndodhet i plagosur dhe i arrestuar, ndërsa theksoi se kanë nisur hetimet si nga Prokuroria e Korçës ashtu edhe nga strukturat e Standardeve Profesionale.
Opozita kërkon përgjegjësi politike
Kreu i Grupit Parlamentar të PD-së, Gazment Bardhi, dënoi ngjarjen dhe kërkoi që autori të marrë dënimin maksimal.
Por përtej dënimit të autorit, opozita po kërkon të hapet një debat më i gjerë për përgjegjësitë institucionale.
Sipas saj, tragjedia nuk mund të reduktohet vetëm në një akt individual kriminal, por duhet të shërbejë për të analizuar nëse strukturat shtetërore funksionuan siç duhet dhe nëse efektivët u ekspozuan ndaj një rreziku që mund të ishte menaxhuar ndryshe.
Mes drejtësisë së nesërme dhe krizave të sotme
Deklarata e Toni Gogut se “institucionet ndërtohen me ligje, por besimi ndërtohet me njerëz” tingëllon si një përmbledhje e sfidës që Shqipëria po përjeton sot.
Nga njëra anë, qeveria flet për reformën në drejtësi, integrimin europian dhe formimin e brezit të ri të magjistratëve. Nga ana tjetër, vendi përballet me pyetje të forta mbi sigurinë, llogaridhënien dhe mbrojtjen e njerëzve që ndodhen në vijën e parë të zbatimit të ligjit, shkruan Politiko.al.
Në fund, qytetarët nuk e matin shtetin vetëm me konferenca, raporte apo statistika. Ata e matin me aftësinë për të garantuar siguri, për të mbrojtur efektivët që veshin uniformën dhe për të dhënë përgjigje kur një polic bie në krye të detyrës./POLITIKO.AL
