Këshilli për Legjislacionin shqyrtoi sot kërkesën e një grupi deputetësh të Grupit Parlamentar të Partisë Demokratike “Për shkarkimin e Kryetarit të Kuvendit të Shqipërisë, Niko Peleshi”.
Deputeti Ivi Kaso u shpreh se, kërkesa e Grupit Parlamentar të Partisë Demokratike ka të bëjë me drejtimin e seancës nga Kryetari i Kuvendit në seancat e datës 16 shtator dhe seancën e datës 18 shtator, në të cilat theksoi Kaso, “ka kryer veprime aktive në kundërshtim të hapur me parashikimet e Kushtetutës dhe Rregulloren e Kuvendit duke i mohuar të drejtat deputetëve të opozitës dhe duke treguar anshmëri politike në drejtimin e Kuvendit”.
Kaso theksoi se, “kjo kërkesë ka të bëjë me mohimin në thelb të së drejtës së deputetëve të Kuvendit për të diskutuar në mënyrë konstruktive, lidhur me efektivitetin e ndryshimeve të propozuara të Rregullores, përshtatshmërinë e tyre dhe pse jo thyerjen e një tradite parlamentare, nisur që nga viti 2013 me anë të së cilës ndryshimi i Rregullores së Kuvendit është bërë me konsensus”.
Po ashtu, shtoi Kaso, edhe në seancën e prezantimit të programit të qeverisë ka pasur shkelje kushtetuese nga Kryetarit i Kuvendit.
“Në seancën e prezantimit të programit të qeverisë ishte Kryeministri, i cili i diktoi Kryetarit formal të Kuvendit mënyrën sesi duhej të drejtohej seanca”, tha Kaso.
Për këto arsye, u shpreh ai, deputetët e opozitës kanë kërkuar shkarkimin e kryetarit të Kuvendit.
Deputeti i mazhorancës, Damian Gjiknuri u shpreh se duhet caktuar një relator dhe të merret koha e nevojshme për diskutim.
“Sot jemi njohur me këtë kërkesë, sepse sot u konstituua dhe ky komision dhe propozojmë të caktojmë një relator dhe ne si mazhorancë pasi jemi njohur me kërkesën që ka paraqitur Kaso të marrim kohën e nevojshme, të caktojmë një njeri, të bëjmë një relatim dhe pastaj të vazhdojmë me diskutimin sepse në fund mund të dalim me një mendim ose palët mund të votojnë sipas pozicionit të tyre politike dhe seancës do t’i shkojmë me raporte të ndara”, u shpreh Gjiknuri.
Deputeti i PS, Fatmir Xhafaj propozoi që relator nga mazhoranca të jetë Damian Gjiknuri. Ndërkohë, relator nga opozita do të jetë Ivi Kaso.
Data e seancës së ardhshme do të përcaktohet nga të dy relatorët.
Sot Këshilli për Legjislacionin zhvilloi mbledhjen e konstituimit.
Këshilli për Legjislacionin përbëhet nga 10 deputetë, të emëruar nga Kryetari i Kuvendi, pasi ka marrë më parë mendimin e kryetarëve të grupeve parlamentare.
Këshilli siguron përfaqësim të barabartë mes shumicës dhe opozitës parlamentare. Anëtarët e Këshillit janë me profesion jurist ose kanë përvojë legjislative.
Këshilli për Legjislacionin kryesohet me rotacion çdo 5 muaj nga secili anëtar, duke filluar sipas renditjes alfabetike të mbiemrit, duke ruajtur parimin e kryesimit një herë nga shumica dhe një herë nga pakica parlamentare.
Nisur nga ky përcaktim, kryetarja e Këshilli për Legjislacionin është Aulona Bylykbashi.
Në fjalën e saj në nisje të mbledhjes së parë të këshillit, Bylykbashi u shpreh se Këshilli për Legjislacionin funksionon si një organ këshillimor, i cili vlerëson dhe jep mendim për çështje kushtetuese ose ligjore që ngrihen në lidhje me tekstin e projektligjeve, gjithashtu për çështjet e harmonizimit me legjislacionin në fuqi, jurisprudencën e Gjykatës Kushtetuese dhe aktet ndërkombëtare.
Kaso kundërshtoi kryesimin nga Aulona Bylykbashi, duke u shprehur se, “është zbatuar gabim parashikimi i pikës 3 të nenit 14 të Rregullores për sa i përket mekanizmit sesi kryesohet ky këshill”.
Sipas tij, duke iu referuar përmbajtjes së deputetëve të Këshillit të Legjislacionit kryesimi duhet t’i takonte deputetes Greta Bardeli.
Anëtarët e Këshillit të Legjislacionit
Aulona Bylykbashi PS
Arian Ndoja PD
Blendi Himçi PD
Damian Gjiknuri PS
Erion Malaj PS
Fatmir Xhafaj PS
Gjin Gjoni PD
Greta Bardeli PD
Ivi Kaso PD
Olsi Komici PS
Anëtarët zëvendësues të Këshillit të Legjislacionit
Ani Dyrmishi PS
Erjona Ismaili PS
Oerd Bylykbashi PD
Gazment Bardhi PD
