Kompania “Zvërnec South Adriatic Development” ka ndërprerë me efekt të menjëhershëm kontratën me shoqërinë private të sigurisë “Major Security”, pas incidentit të rëndë të ndodhur gjatë protestës së banorëve në Zvërnec, ku një protestues u godit dhe u tërhoq zvarrë nga punonjës sigurie.
Vendimi është marrë pas publikimit të pamjeve filmike, të cilat shkaktuan reagime të forta publike dhe sollën ndërhyrjen e Policisë së Shtetit. Pas ngjarjes, policia arrestoi Geraldo Bibën, punonjës i shoqërisë së sigurisë, ndërsa procedoi penalisht Artur Gramin dhe Gazment Vathin. Ndërkohë, në vijim të masave administrative, u pezullua edhe drejtori i Policisë së Vlorës.
Në një reagim publik, “Zvërnec South Adriatic Development” deklaron se ka shqyrtuar me përgjegjësi materialet e bëra publike dhe se sjellja e shoqërisë së sigurisë është e pajustifikueshme. Kompania thekson se vazhdimi i marrëdhënies kontraktuale me këtë subjekt është bërë i papranueshëm.
Sipas kompanisë, për garantimin e sigurisë në zonën zhvillimore, të cilën ajo e cilëson si pronë private, ishte kontraktuar një shoqëri sigurie e pajisur me lejet dhe licencat përkatëse nga institucionet shtetërore, si dhe me përvojë në këtë fushë.
Megjithatë, kompania distancohet nga veprimet e punonjësve të sigurisë, duke theksuar se ata nuk kanë pasur në asnjë moment udhëzime për të vepruar në kundërshtim me ligjin apo për të cenuar të drejtat e qytetarëve.
“Ndërhyrja ndaj një qytetari që ishte në të drejtën e tij të plotë për të protestuar jashtë kufirit të pronës, dhe tërheqja e tij brenda saj për të ushtruar forcë, nuk është vetëm e papranueshme moralisht, por edhe e dënueshme penalisht”, thuhet në reagimin e kompanisë.
Për këtë arsye, “Zvërnec South Adriatic Development” njofton se ka ndërprerë menjëherë kontratën me shoqërinë e sigurisë.
Kompania kërkon ndjesë për incidentin, të cilin e cilëson të panevojshëm, dhe u bën thirrje organeve kompetente të kryejnë një hetim të plotë e të paanshëm për ngjarjen, si dhe të ndëshkojnë sipas ligjit personat përgjegjës.
Ajo deklaron gjithashtu se është në dispozicion të plotë të autoriteteve dhe të gjitha palëve të interesuara, me gatishmëri dhe transparencë.
Në reagim, kompania thekson se marrëdhënia me komunitetin është thelbësore për investitorët dhe se në javët në vijim do të shtojë përpjekjet për një komunikim më të drejtpërdrejtë me banorët e zonës.
“Zvërnec South Adriatic Development” shpreh po ashtu keqardhje që, sipas saj, incidenti po shfrytëzohet për të qarkulluar në rrjetet sociale pamje të fabrikuara të projektit, me qëllim krijimin e perceptimit se zhvillimi do të shkatërrojë natyrën.
Kompania pretendon se projekti synon të harmonizohet me natyrën dhe të zbatohet sipas standardeve të larta për mbrojtjen e ekosistemeve të zonës. Sipas saj, projekti final do t’i prezantohet publikut në kohën e duhur, si dëshmi e një zhvillimi që respekton trashëgiminë natyrore të zonës.
Ngjarja në Zvërnec ka rikthyer vëmendjen te tensionet mes banorëve, investitorëve dhe institucioneve për projektet zhvillimore në zonë, ndërsa hetimet pritet të sqarojnë përgjegjësitë konkrete për dhunën e ushtruar ndaj protestuesit.
