Të kursesh para, shpesh është e mërzitshme dhe e lodhshme. Sigurisht, hyn edhe dëshira për të shpenzuar dhe llastuar veten. Kjo është edhe arsyeja pse metoda e “katër kovave” po bëhet virale në TikTok, pasi sipas përdoruesve të aplikacionit, është një praktikë financiare që është njëkohësisht e thjeshtë dhe efektive për të kursyer para.
“Ideja? Ndaji të ardhurat në katër kategori të dallueshme dhe cakto një qëllim për çdo para”, thotë Alex King, trajner financiar dhe themelues i faqes së financave personale “Generation Money”.
Hileja e “katër kovave” i ndan paratë në dy kova për shpenzime (thelbësore dhe stil jete) dhe dy për grumbullim pasurie (kursime afatshkurtra dhe investime afatgjata). “Kjo siguron që nevojat bazë të jenë të mbuluara, por do të kursesh lekë për të ardhmen dhe mund të bësh shpenzime pa ndjesi faji”.
Siç shpjegon krijuesja e TikTok @bobeema, kjo është më pak stresuese sesa ndjekja e çdo shpenzimi. “Është një trik mendor dhe vizual, i dobishëm për të të bërë të mendosh në cilën kategori shkojnë çdo muaj shpenzimet dhe të ardhurat e tua,” shton King. “Kjo e bën ndjekjen e parave më të qëllimshme dhe mund të çojë në vendimmarrje financiare më të mira.”
Metoda, gjithashtu, të ndihmon të mbash një buxhet, veçanërisht nëse je fillestar në kursime ose prirur për të shpenzuar tepër. “Nëse je dikush që ndien se nuk kontrollon paratë çdo muaj, ose që të duket sikur paratë ‘zhduken’, atëherë metoda e “katër kovave” është për ty,” thotë ai.
Pra, teoria është e thjeshtë! Do më shumë para për qejf? “Rrite” kovën e stilit të jetesës. Do kursime më të shpejta? Hidh më shumë para aty. King rekomandon të fillosh me shpenzimet fikse bazë, pastaj të rregullosh të tjerat sipas nevojës.
Një këshillë e fundit? Jepu kovave emra më domethënës. Për shembull, në vend të kursimeve thjesht, përdor “Fondi për Plazh” ose në vend të investimeve, “Qetësia mendore”. Kjo i bën qëllimet të duken reale dhe të bën të kursesh.
