Policia e Shtetit ka finalizuar me sukses një tjetër operacion të rëndësishëm për kapjen e personave në kërkim ndërkombëtar. Në kuadër të operacionit të koduar “Operacionalja 54”, u arrestua në Tiranë Musli Aslani, 41 vjeç, me origjinë nga Shkupi, Maqedonia e Veriut.
Aslani ishte shpallur në kërkim ndërkombëtar nga autoritetet austriake, pasi ndaj tij ishte lëshuar urdhër arresti nga Zyra e Prokurorit Publik të Innsbruck, Austri, për disa vepra të rënda penale, përfshirë:
-Trafikim droge
-Kërcënim i rrezikshëm
-Zhvatje e rënduar
-Plagosje
Sipas Kodit Penal Austriak, për këto akuza parashikohet një dënim maksimal deri në 20 vite burgim.
Gjatë kontrollit fizik në momentin e arrestimit, Aslanit iu gjet dhe u sekuestrua një sasi lënde e dyshuar narkotike e llojit kanabis, që iu dorëzua autoriteteve për hetim të mëtejshëm.
Operacioni u drejtua nga strukturat e Drejtoria e Forcës së Posaçme Operacionale, në bashkëpunim me Interpol Tirana, i cili tashmë ka nisur procedurat ligjore për ekstradimin e Musli Aslanit drejt Austrisë.
Ky është operacioni i 54-të në serinë e aksioneve të njëpasnjëshme për kapjen e personave të rrezikshëm me urdhër arresti ndërkombëtar.
