Kryebashkiaku Erion Veliaj u arrestua të hënën nën akuzën e korrupsionit aktiv dhe pastrimit të parave, pas kallëzimit të bërë nga një shtetas i vetëidentifikuar si Nesti Angoni.
Këllëzimi i tij vuri në lëvizje SPAK-un i cili mori nën hetim Veliajn, bashkëshorten e tij Ajola Xoxa dhe familjarët e tjetë.
Por, cili ishte kallëzimi i Nesti Angonit?
Më 19 korrik 2023, Prokuroria e Posaçme mori kallëzimin nga Nesti Angoni, i cili në dokumente thotë se jeton në rrugën “5 Maji” në Tiranë. Kallëzimi i tij përfshin akuza për veprime korruptive të kryebashkiakut, lidhjet e tij me kompani dhe biznesmenë.
Angoni përmend disa transaksione dhe marrëdhënie, përfshirë ato mes Veliajt dhe Gentian Sulës, pronarit të kompanisë “AGI CONS”.
Sipas kallëzuesit, kur shtetasi Veliaj ishte Ministër i Punës, bleu një pasuri të paluajtshme, banesë, të në bllokun rezidencial “Kodra e Diellit”, në pronësi të bisnesmenit Sula. Pas kësaj, bashkëshortja e këtij të fundit u emërua zëvendësministre në Ministrinë ku Veliaj ishte titullar. Më pas, banesa në fjalë është zgjeruar me një kat dhe për të është ndërtuar një ashensor i veçantë.
Angoni shpjegon më tej në kallëzim se kompania “AGI CONS”, me pronar Genti Sulën, është përfshirë edhe në projektin e ndërtimit të Teatrit Kombëtar.
Kallëzimi përmend se Erion Veliaj aktualisht posedon tre vila në një kompleks rezidencial në Kavajë, të ndërtuara nga kompania “AGI CONS” e shtetasit Genti Sula. Njëra nga këto vila është në pronësi të vëllait të Veliajt, ndërsa vila e tretë është shkatërruar dhe dy vilat ekzistuese janë rikonstruktuar. Vlera e këtyre vilave, sipas kallëzuesit, arrin rreth 500 mijë euro. Për vilën e tretë, kallëzuesi thekson se Erion Veliaj e ka prishur duke shpërdoruar 500,000 euro me qëllim krijimin e hapësirave shtesë. Për prishjen e objektit janë shfrytëzuar makineritë e Ujësjellësit të Kavajës. Kallëzuesi ngre pyetjen nëse për këtë shembje është marrë një leje ndërtimi dhe nëse ekzistojnë dokumenta që vërtetojnë shpenzimet e bëra.
Angoni ngre dyshime për burimin e mundësive financiare të Erion Veliajt, duke kërkuar hetime mbi dokumentet e blerjeve, pagesave bankare dhe të tjera që mund të provojnë ligjshmërinë e veprimeve të tij.
