Flamur i kuq për tenderin 120 milionë lekë / Gentian Kreka fiton i vetëm kontratën për dializën në QSUT
Një tjetër kontratë publike me vlerë të lartë është fituar nga kompania INCOMED shpk, në pronësi të Gentian Krekës, këtë herë për furnizimin me barna dhe materiale për dializë peritoneale në Qendrën Spitalore Universitare “Nënë Tereza”.
Procedura e prokurimit, me fond limit 120,747,901 lekë, është zhvilluar nga Operatori i Blerjeve të Përqendruara dhe është shënuar me “RedFlag” për mungesë konkurrence, pasi në garë ka marrë pjesë vetëm një operator ekonomik: INCOMED shpk.
Tenderi, me numër reference REF-65758-10-20-2025, është zhvilluar si procedurë e hapur mbi kufirin e lartë monetar. Megjithatë, pavarësisht natyrës së hapur të procedurës, rezulton se vetëm një kompani ka paraqitur ofertë. Oferta fituese ka qenë 120,578,100 lekë pa TVSH, shumë pothuajse identike me fondin limit të parashikuar.
Sipas të dhënave zyrtare, kontrata ka një kohëzgjatje 24-mujore dhe nuk ka pasur asnjë ankesë apo operator të skualifikuar pas shpalljes së fituesit më 2 dhjetor 2025.
Kategoria “RedFlag”, e përdorur nga platformat monitoruese të prokurimeve, sinjalizon raste ku mungesa e konkurrencës mund të paraqesë risk të shtuar për transparencën dhe integritetin e procedurës, edhe pse ligji shqiptar lejon zhvillimin e tenderëve me një ofertues të vetëm.
INCOMED shpk, e themeluar në vitin 2009 dhe me seli në Tiranë, operon në tregtimin e barnave dhe pajisjeve mjekësore. Kompania zotërohet 100% nga Gentian Kreka dhe, sipas të dhënave publike, ka përfituar ndër vite qindra kontrata publike në sektorin e shëndetësisë.
Ky tender i fundit shton një tjetër kontratë me vlerë të konsiderueshme në portofolin e kompanisë, ndërsa mungesa e konkurrencës në procedurë e vendos atë nën vëzhgim publik.
Të dhënat janë marrë nga platforma Open Procurement Albania dhe nga regjistri publik i biznesit. Palët e përfshira kanë të drejtën e reagimit për çdo sqarim apo qëndrim zyrtar./Report.al/
