Instagram do ta ndërpresë funksionin e enkriptimit “end-to-end” për mesazhet private duke filluar nga 8 maji 2026, pas disa viteve kritikash nga agjencitë ligjzbatuese dhe organizatat për mbrojtjen e fëmijëve.
Sipas një njoftimi të publikuar në faqet ndihmëse të Meta dhe një përditësimi të një postimi të mëhershëm nga viti 2022, ky ndryshim do të bëjë që mesazhet direkte në Instagram të mos jenë më të enkriptuara. Kjo do të thotë se kompania do të ketë mundësi të shohë përmbajtjen e bisedave mes përdoruesve, ndryshe nga më parë kur kjo ishte e mundur vetëm për ata që nuk e kishin aktivizuar enkriptimin.
Madje, sipas testimeve të bëra në Australi, kjo veçori duket se tashmë është çaktivizuar për disa përdorues. Një zëdhënës i Metës ka deklaruar se arsyeja kryesore për heqjen e enkriptimit është përdorimi i ulët i këtij funksioni nga përdoruesit, shkruan The Guardian, transmeton Gazeta Express.
Ideja për të sjellë enkriptim “end-to-end” në të gjitha platformat e Metës ishte përmendur fillimisht nga drejtori ekzekutiv Mark Zuckerberg që në vitin 2019, por implementimi nisi vetëm në vitin 2023.
Gjatë kësaj kohe, kompania është përballur me presion të vazhdueshëm nga institucione të ndryshme si FBI, Interpol dhe agjenci të tjera ndërkombëtare, të cilat kanë argumentuar se enkriptimi e vështirëson identifikimin e aktiviteteve të rrezikshme online, përfshirë shfrytëzimin e fëmijëve, terrorizmin dhe ekstremizmin e dhunshëm.
Nga ana tjetër, përfaqësues të sigurisë digjitale theksojnë se edhe pse enkriptimi është i rëndësishëm për privatësinë, platformat duhet të kenë mekanizma për të parandaluar dhe reaguar ndaj abuzimeve. Ata paralajmërojnë se mungesa e masave mbrojtëse në një sistem të enkriptuar mund të rrisë rreziqet dhe të pengojë zbulimin e rasteve të dëmshme.
Ndërkohë, ekspertë të të drejtave digjitale mendojnë se vendimi nuk lidhet vetëm me presionin nga autoritetet, por edhe me strategjinë e biznesit të Metës. Sipas tyre, fakti që WhatsApp do të vazhdojë të mbetet i enkriptuar tregon se kompania mund të jetë duke ndarë më qartë rrjetet sociale nga aplikacionet e komunikimit privat.
Gjithashtu, përmendet edhe aspekti financiar, pasi heqja e enkriptimit mund t’i japë Metës më shumë mundësi për të analizuar përmbajtjen e mesazheve, duke ndihmuar në targetimin e reklamave apo zhvillimin e teknologjive të reja si chatbot-et.
Në përfundim, ky vendim shihet si një hap prapa për privatësinë nga disa ekspertë, të cilët argumentojnë se kompanitë teknologjike duhet të investojnë më shumë në përmirësimin e sigurisë dhe mbrojtjes së të dhënave, jo në dobësimin e saj.
