Kur bëhet fjalë për pasuritë publike në këtë vend, qytetarët janë thjesht qiradhënës të detyruar që paguajnë faturat, ndërsa oligarkët dhe miqtë e oborrit janë pronarë me kohë të plotë.
Rasti më i fundit në Pallatin e Kongreseve është epitoma e talljes me taksapaguesit: një institucion i shndërruar brenda natës nga shtëpi arti në sallë solemnitetesh për dasma private!
Më 21 korrik, qindra qytetarë që kishin blerë biletat për të shijuar koncertin e legjendarit italian Zucchero u përballën me një surprizë të hidhur. Në vend të tapetit të kuq të artit, gjetën dyert e bllokuara, korridore rrugë-dytesore dhe kaos total.
Arsyja? Pallati i Kongreseve ishte kapur për fyt nga përgatitjet madhështore për dasmën e djalit të biznesmenit Kadri Morina, mik i ngushtë i Kryeministrit Edi Rama.
Pra, llogaria është e thjeshtë:
Për qytetarin e thjeshtë që paguan biletën: Hyrje alternative, korridore shërbimesh, stres dhe konfuzion.
Për djalin e mikut të pushtetit: Pallati i madh, skena, dritat dhe oborri shtetëror në dispozicion absolut për orkestrën e dasmës.
Kjo nuk është thjesht një shkelje e rregullave; është një arrogancë e pastër që tregon se si pronat e përbashkëta trajtohen si çifligje private. Pallati i Kongreseve nuk u ngrit që aty të festohen gëzimet familjare të elitës ndërkohë që kultura dhe publiku përplasen në derën e pasme.
Institucionet tona, zakonisht kaq efikase kur duhet t’i marrin lekët qytetarëve, tani heshtin. Kush e dha këtë leje? Me çfarë tarifash, kriteresh dhe vendimesh një aset kombëtar bllokohet për një dasmë private, duke sakrifikuar një aktivitet kulturor të paralajmëruar?
Qytetarët nuk mund të trajtohen si qiraxhinj të padëshiruar në shtëpinë e tyre. Kur taksat e shqiptarëve mirëmbajnë muret e Pallatit të Kongreseve, e drejta për të hyrë aty nuk mund t’i nënshtrohet listës së të ftuarave të dasmës së radhës së pushtetit!/JOQ
