Hajdutët e veprave të artit në Evropë po kryejnë grabitje gjithnjë e më të dhunshme, duke vënë në shënjestër arin dhe bizhuteritë, ndërsa bandat e specializuara në krime të tilla janë zëvendësuar nga oportunistë të rekrutuar përmes rrjeteve sociale, njoftoi Europol.
Grabitja në Muzeun e Luvrit në Paris, tetorin e vitit të kaluar, është një shembull tipik i këtyre ndryshimeve, tha Europol, pasi grabitësit kërcënuan rojet dhe vizitorët dhe vodhën bizhuteri me vlerë 88 milionë euro, përfshirë diademën e perandoreshës Eugenie.
Gjatë dy viteve të fundit, hajdutët e veprave të artit e kanë përqendruar vëmendjen te metalet e çmuara, bizhuteritë dhe objektet kulturore që ofrojnë fitime më të mëdha, theksoi në një raport Agjencia e Bashkimit Evropian për Bashkëpunimin në Zbatimin e Ligjit.
Çmimi i arit është rritur me 85% gjatë dy viteve të fundit, pasi investitorët dhe bankat qendrore po i drejtohen metalit të çmuar si një investim i sigurt.
London Bullion Market Association, e cila mbikëqyr qendrën e tregtimit të arit në Londër, paralajmëroi se “ndërsa çmimet e arit rriten në nivele rekord, rriten gjithashtu edhe trafikimi i paligjshëm dhe shtrembërimet e tregut”.
Ndërkohë, Europol përshkruan se “kriminelët hyjnë me forcë në ambiente dhe thyejnë vitrinat duke përdorur mjete si vare, sëpata, leva dhe, në disa raste, eksplozivë”.
Ndërsa bandat tradicionale përdornin “mashtrimin dhe fshehtësinë”, kishin një drejtues qendror dhe ekspertizë të specializuar, vjedhjet e fundit janë kryer nga grupe të decentralizuara dhe të përkohshme oportunistësh që kërkojnë fitim, të rekrutuar përmes rrjeteve sociale mbi bazën e kryerjes së një “krimi si shërbim”, thuhet në raport.
Europol shtoi se hajdutët po vënë gjithnjë e më shumë në shënjestër objektet prej ari, nga copëzat e arit dhe monedhat deri te bizhuteritë.
“Metalet e çmuara mund të shkrihen lehtësisht, duke mos lënë asnjë gjurmë për autoritetet e zbatimit të ligjit dhe duke lehtësuar shitjen e tyre të paligjshme gjatë procesit të nxjerrjes në treg të sendeve të vjedhura. Gurët e çmuar që ndodhen në bizhuteri, nga ana tjetër, mund të hiqen lehtësisht dhe të rishiten”, thuhet në raport.
Vitin e kaluar, në janar, hajdutët përdorën eksplozivë për të vjedhur një përkrenare ari 2 500-vjeçare dhe tre byzylykë të lashtë ari nga një muze në Holandë. Objektet u gjetën më vonë dhe iu kthyen Rumanisë, megjithëse njëri prej byzylykëve ende nuk është gjetur.
Europol vuri në dukje gjithashtu rritjen e vjedhjeve të objekteve të lashta të artit prej porcelani kinez, si vazot e dinastisë Ming, për shkak të kërkesës së lartë për to.
