Kompania Eida , e Frident Kuqit, ka qenë e para që ka reflektuar paralajmërimet për rritjen e çmimit të naftës, duke e shtrenjtuar me gati 4 lekë për litër.
Aktualisht, në pikat e saj të karburanteve, nafta po tregtohet me 179 lekë për litër, nga 175 lekë që ishte një ditë më parë.
Tregu i karburanteve në Shqipëri prej kohësh shihet si një ndër më problematikët, pasi rritjet e çmimeve pasqyrohen menjëherë, ndërsa uljet reflektohen me shumë vonesë.
Vetëm një ditë më parë, Shoqata e Hidrokarbureve paralajmëroi se çmimi i naftës mund të rritet deri në 40 lekë për litër.
Lidhur me situatën ka reaguar deputeti socialist Erjon Braçe i cili akuzon drejtpërdrejt shoqatën si një kartel që po abuzon me tregun.
“Karteli i hidrokarbureve që vepron si shoqatë, paska thënë që do rrisë çmimin me 20 lekë për 48 orë, deri në 40 lekë për litër në vijim! Arsyeja e tyre – bursa!! Kur i toleron, këta i bëjnë të gjitha, të bëjnë edhe për budalla,” shkroi Braçe në rrjetet sociale.
Ai ka sjellë edhe argumente për të mbështetur akuzat e tij, duke theksuar se çmimi i naftës në pompë ka mbetur 173 lekë për litër prej një viti, pa lëvizur asnjë ditë, pavarësisht ndryshimeve në bursë apo kursin e këmbimit të valutave.
“Ndryshoi bursa, u rrënua dollari e euro dhe çmimi i këtyre nuk ndryshoi, zero, asnjë qindarkë! Tani çmimi do ndryshojë për 48 orë nga lufta?”, ka shtuar ai.
Braçe ka kërkuar marrjen e masave të menjëhershme për të ndalur abuzimin, duke propozuar rikthimin e Bordit të Karburanteve, i cili u përdor gjatë kohës së luftës në Ukrainë. Sipas tij, ky bord nuk është shpallur antikushtetues dhe mund të shërbejë si një kundërmasë efektive për mbrojtjen e interesit publik.
“Ua thashë edhe kolegëve të mi në Partinë Socialiste sot në mëngjes: kur abuzimi ulëret, kundërmasa duhet të jetë e shpejtë dhe efektive! Ndryshe ne do paguajmë abuzimin si qytetarë e si qeveri, këta thjesht do pasurohen! E fundit gjë; Bordi i Hidrokarbureve që u përdor gjatë kohës së luftës në Ukrainë – nuk është shpallur antikushtetues ndonjëherë! Nëse do jetë profesional dhe me fokus interesin publik, mund të jetë një nga kundërmasat ndaj abuzimit,” përfundon Braçe.
