Policia e Dibrës ka arrestuar dy persona, të cilët akuzohen për shpërndarje të lëndëve narkotike, teksa në banesë u është gjetur edhe një armë zjarri kallashnikov dhe municion luftarak.
Në kuadër të operacionit të koduar “Mesnata” janë vënë në pranga shtetasit Elsi Kuca alias Dauti 26 vjeç, banues në fshatin Blliçë, i akuzuar për veprën penale “Prodhimi dhe shitja e lëndëve narkotike” dhe shtetasin Aleksandër Tota, 22 vjeç, banues në fshatin Fushë-Alie, i akuzuar për veprën penale “Mbajtja pa leje e armëve luftarake”.
Ata kanë qenë duke udhëtuar me një automjet tip “Peugeot”, të drejtuar nga 26-vjeçari, në momentin kur janë ndaluar nga Policia në fshatin Sllovë. raportohet se gjatë kontrollit fizik, 26-vjeçarit i është gjetur e fshehur në trup një sasi lënde narkotike kanabis, e ndarë në doza, gati për shitje.
Po në vijim të operacionit, shërbimet e Policisë kanë ushtruar kontrolle në banesat e këtyre dy shtetasve, ku, në banesën e Aleksandër Totës është gjetur një armë zjarri kallashnikov dhe 25 copë fishekë, të cilët i mbante pa leje.
