Pas rrëzimit të kërkesës së Fatmir Mediut dhe avokatëve të tij nga gjyqtarja e posaçme Etleva Deda për përjashtimin e gjyqtares Irena Gjoka nga gjykimi i dosjes “Gërdeci”, tashmë është vetë gjyqtarja Gjoka që kërkon të largohet nga gjykimi i çështjes. Ditën e djeshme, më 11 nëntor, ajo i është drejtuar nën/kryetarit të GJKKO-së, Erion Bani, duke kërkuar të largohet nga procesi.
Gjyqtarja pretendon se ndodhet në kushtet kur nuk mund të jetë pjesë e gjykimit, pasi ka qenë gjyqtare e seancës paraprake në këtë çështje dhe e mori gjykimin kur i pandehuri kërkoi fillimisht gjykim të shkurtuar. Megjithatë, pasi i pandehuri ndryshoi qëndrim dhe kërkesa për gjykim me procedurë të zakonshme u pranua, seancat gjyqësore kanë vijuar për më shumë se një vit. Irena Gjoka thotë se ndodhet në kushte papajtueshmërie për të vijuar këtë gjykim.
E pyetur nga avokatët e Fatmir Mediut në seancën e djeshme, Gjoka tha se kërkesa e saj për largim ka lindur, pjesërisht, edhe nga vetë kërkesa e të pandehurit për përjashtimin e saj, e cila u rrëzua nga gjyqtarja Etleva Deda, por për shkaqe të tjera. Pritet që në lidhje me kërkesën e Gjokës të shprehet drejtuesi i GJKKO-së, Erion Bani.
Megjithatë, seanca e djeshme vijoi me kundërshtimet e Mediut mbi deklarimet e ekspertëve. Procesi ndodhet në fazën ku ka përfunduar paraqitja e provave nga SPAK, dhe pritet të nisë pyetja e dëshmitarëve të kërkuar nga mbrojtja.
