Mustafë Abdullahu duket se do të jetë i operuari i radhës te Tirana. Lojtari është dëmtuar dy herë në menisk dhe nëse herën e parë e kaloi me terapi, këtë herë duket se gjërat do të jenë ndryshe. Stafi teknik dhe ai mjekësor kanë vendosur në një zë.
Lojtari të operohet dhe të heqë një herë e mirë shqetësimin që ka dhe që e ka lënë dy herë jashtë skuadrës, pikërisht në fazën e parë para Egnatias dhe tani para Vllaznisë.
Operacioni nuk është planifikuar ende, po mund të bëhet ose në ditët e fundit të dhjetorit ose në fillim të janarit. Pas operacionit lojtari mund të qëndrojë jashtë fushe 2 muaj. Abdullahu është portieri i dytë që operohet pas Gentian Selmanit. Mediat rumune të mërkurën kanë shkruar se Rapidi ka shprehur interesim për portierin 19-vjeçar.
Sipas “sport.ro”, portieri i Tiranës është futur në listën e zyrtarëve që merren me transferime te Rapidi dhe në këtë dimër ai mund të bëjë kalimin në kampionatin e Rumanisë. Mustafë Abdullahu ka pasur ecuri pozitive në Shqipëri, edhe pse kalimi i tij në Tiranë ndodhi vetëm disa muaj më parë. Abdullahu vlerësohet portier me potencial dhe shumë premtues.
“Patjetër që e rrit shumë motivin dhe ndihem shumë mirë kur ka interesim për mua. Jam shumë i kënaqur me zhvillimin. Por duhet punë e angazhim i madh për të arritur më shumë. Uroj që shpejt të arrij majat e futbollit europian. Pres të ftohem shpejt te Përfaqësuesja A e Kosovës. Është kënaqësi të luaj për Kosovën. Jam shumë i kënaqur që debutova për Përfaqësuesen U-21 ndaj Izraelit dhe do ta jap më të mirën edhe në të ardhmen”, ka thënë Abdullahu për “Koha Ditore”, të mërkurën.
