Kreun i Fondit Shqiptar të Zhvillimit, Dritan Agolli ka krijuar një skemë korrupsioni, sfiduese për SPAK-um, me dy oligarkët Shkëlqim Fusha dhe Bashkim Ulaj. Agolli ka diktuar tendera me vlerë dhjetëra milionë euro për Fushën dhe Ulajn, ndërsa dy oligarkët i kanë dhënë në këmbim Agollit prona dhe zyra për bizneset e djalit Flladi dhe bashkëshortes Rovena Agolli. Palët e implikuara kanë lënë gjurmë dhe prova konkrete gjatë zbatimit të këtij operacioni të përfitimit të kundraligjshëm të parave publike.
Afera Agolli-Fusha
Dritan Agolli i ka dhënë kompanisë Fusha shpk të oligarkut Shkëlqim Fusha rreth 60 milionë euro tendera. Tenderat për Fushën janë finalizuar me procedura të manipuluara dhe të dyshuara si fiktive, kryesisht me ofertë fituese gati sa fondi limit, duke maksimalizuar fitimet. Në këmbim, Fusha i ka dhënë Agollit një sipërfaqe toke pranë TEG për të ngritur një kompleks vilash, me një çmim simbolik.
Më konkretisht Shkëlqim Fusha ka një sipërfaqe toke te rrethrretullimi i TEG, buzë Unazës Lindore të Tiranës. Në një pjesë të tokës, Fusha ka ndërtuar një komples vilash, komplaks i njohur si “Sofia Hill Residence”. Pjesa e pa zënë e truallit u nda dhe u rrethua me murë. Nga verifikimet rezulton se kjo pjesë trualli ka kaluar në emrin e drejtorit të Fondit Shqiptar të Zhvillimit, Dritan Agolli, i cili synon të ndërtojë disa vila.
Nga ana e tij, Agolli, për të evituar ekspozimin, e ka kaluar pronën në emrin e kartelit të kompanive që kontrollin bashkë me dalin dhe bashkëshorten. I biri Flladi Agolli, nga student në SHBA, është shëndërruar brenda dy vitesh në biznesmen në Tiranë, duke u bërë pronar i tre kompanive me aktivitetit të dyshimtë, ARDEX, BEDOUIN dhe HMS, me objekt hapjen dhe menaxhimin e bar-kafeve, fast-food dhe restoranteve, manaxhim i ambjenteve publike dhe private, komplekseve turistike etj.
Pronat që oligarkët i japin Dritan Agollit në këmbim të tenderave të FSHZH, i kamuflon me kompanitë e të birit. Një vit pasi Dritan Agolli u emëruar nga Edi Rama në krye të FSHZH, i biri Flladi Agolli (viti 2020) deklaron se gjyshi i ka dhuruar një shtëpi me sipërfaqe 155 m2.
Ndërkaq, Dritan Agolli ka shitur një apartament 360 mijë euro, të cilin më parë kishte deklaruar se e kishte blerë 11 milionë lekë ose 110 mijë euro. Me këtë lëvizje, Agolli ka blerë disa apartamente dhe garazhe.
Agolli është pronarë i kompanisë private MAGNUM OPUS GROUP, me objekt studime në nivelin strategjik, manaxherial dhe operacional, analiza, vrojtime, sondazhe, kërkime, vlerësime; Konsulencë, shërbime administrative etj. Kompania rezulton se ka marrë para publike.
Pas emërimit në krye të FSHZH, Dritan Agolli dyshohet se ka marrë para publike me anë të kësaj kompanie përmes nonkontraktimit me kompani që u ka dhënë tendera publikë.
Skemë korrupsioni me Bashkim Ulajn
Dokumentet tregojnë se Dritan Agolli, si kryetar i FSHZH, i ka dhënë kompanisë Gener 2 të Bashkim Ulajt, të paktën 14 milionë euro tendera publikë. 14 milionë euro tendera i ka përfituar nga FSHZH, me firmën e Dritan Agollit, kompania 4 A-M shpk, me pronar në letra Ardit Metaliaj, i cili dyshohet se është maskë e Bashkim Ulajt.
Në këmbim, bashkëshortja dhe djali i Dritan Agollit, Rovena dhe Flladi Agolli, kanë marrë zyra dhe apartamente te kullat në digën e liqenit, të ndërtuar nga firma “Gener 2” e Bashkim Ulajt. Në këtë firmë ka qenë i punësuar edhe vetë Dritan Agolli për një kohë të gjatë para se të emërohej në krye të FSHZH. Pra, në krye të FSHZH është vendosur një ish punonjë i Bashkim Ulajt, i cili nisi t’i jepte tendera ish pronarit të tij.
Në janar të vitit 2019, Edi Rama emëroi Dritan Agollin drejtor të përgjithshëm të Fondit Shqiptar të Zhvillimit. Ky fond tenderon në vit rreth 250 milionë euro. Në 10 dhjetor të vitit 2020, Fondi Shqiptar i Zhvillimit me në krye Dritan Agollin shpall fituese kompaninë Gener 2 të Bashkim Ulajt për tenderin ‘Rikualifikimi urban pranë qendrës së qytetit Vlorë, Zona A drejtimi i kullës së Sahatit, Kulla e Sahatit dhe Sheshi i Flamurit’, me vlerë rreth 7 milionë euro.
Tre vjet më vonë, në dhjetor 2023, bashkëshortja e Dritan Agollit, Rovena Agolli, themelon kompaninë Agolli Audit & Consulting, me nipt M32405037S Emri i Subjektit: Agolli Audit & Consulting, me objekt auditim ligjor dhe joligjor të pasqyrave financiare për Institucione me interes publik, OJF, shoqëri tregtare, mbajtja e llogarive kontabël etj. Zyrat e kësaj kompanie rezultojnë pikërisht te kullat e Bashkim Ulajt, te diga e Liqenit në Tiranë. Bëhet fjalë për zyra luksoze, qiraja e të cilave kushton mijëra euro në muaj.
Faksimile: Bashkëshortja Dritan Agollit ka marrë zyra te pallatet e “Gener 2”
Ky nuk është episodi i vetëm. Në qershor të vitit 2020, djali i Dritan Agollit, Flladi Agolli, themelon kompaninë HMS, me adresë “Rruga e Kosovarëve, kompleksi rezidencial ‘Lake View’, ap. B202/2”, pra te kullat e Bashkim Ulajt. Kjo firmë ka si veprimtari menaxhimin e ambienteve publike dhe private, komplekseve turistike, pushuese dhe banimi. Madje, edhe administrim të sipërfaqeve publike dhe private ranore, plazhe dhe çdo shërbim i lidhur ngushtësisht me to.
Tre muaj më pas, në shtator 2020, Fondi Shqiptar i Zhvillimit me në krye Dritan Agollin ka shpallur fituese kompaninë Gener 2 të oligarkut Bashkim Ulajt për tenderin me objekt ‘Ndërtimi i Rrjetit Rrugor dhe Infrastrukturës Urbane të Zonës 1, Njësia Administrative Thumane”, Njësia Administrative Thumane, Bashkia Krujë’, me vlerë rreth 5 milionë euro.
Skema e korrupsionit është e qartë. Dritan Agolli ka punuar më parë për kompaninë e Bashkim Ulajt. Pasi Agolli bëhet drejtor i Fondit Shqiptar të Zhvillimit i jep Bashkim Ulajt 14 milionë euro tendera. Nga ana e tij, Bashkim Ulaj i jep zyra Dritan Agollit për bizneset e gruas dhe të djalit, Rovena dhe Flladi Agolli.
/Prapaskena/
