Aksioni i ndërmarrë për lirmin e hapësirave publike me urdhër të kryeministrit Edi Rama, duket se nuk po zbatohet për të gjithë. Së fundmi një qytetar ka denoncuar me foto gjendjen e trotuareve të cilat janë zënë nga disa pika të “Big Market” në Tiranë dhe Vlorë, të cilat janë shndërruar në përgjysmuese trotuaresh e hapësirave publike të këmbësorëve në mes të qytetit. Në imazhet e publikuara në JOQ, hapësirat publike janë zënë nga paleta, frigoriferë, kuti dhe stendat e produkteve.
“Ju dërgoj disa foto nga Vlora dhe Tirana, ku Big Market ka zënë komplet trotuaret. Në vend që të ecin njerëzit, ecin mbi paleta, frigoriferë dhe kartona. Po kalove me fëmijë ose me karrocë, del në rrugë, mes makinave! Rama thotë se po i rregullon qytetet, por u bie në qafë dyqaneve të vogla që nxjerrin një tavolinë me produkte. Kurse këta oligarkët, si Vullnet Sinaj, që kanë bllokuar gjysmën e qytetit nuk i prek njeri! Apo këto që nxjerr ky nuk janë rraqe…??? Ku është shteti për këta? Publikojeni që ta shohë e gjithë Vlora dhe Tirona.“ – shkruan qytetari.
Deri tani aksioni ka përfshirë kryesisht bare, restorante apo lavazhe. Ngelet për tu parë nëse do shtrihet edhe më gjerë.
Aksioni i lirimit të hapësirave publike ka nisur pothuajse në të gjithë vendin me urdhër të kryeministrit Edi Rama. Fenomeni “tokë e xanun”, sipas Ramës, nuk do të ekzistojnë më. Lidhur me këtë, ai ka bërë thirrje për të gjitha bizneset apo individët të cilët kanë zaptuar padrejtësisht hapësirat publike, t’i lirojnë menjëherë. Sakaq, kryeministri ka paralajmëruar se do të përballen me ligjin kushdo që e kundërshton aksionin.
