Delvina përjetoi një natë tmerri nga zjarri i madh dhe i rrezikshëm që iu afrua qytetit, por edhe për shkak se Shqipëria nuk ka mjetet e nevojshme për përballimin e situatave të tilla.
Në orët e para të mëngjesit të kësaj të mërkure, ka filluar edhe ndërhyrja nga ajri për shuarjen e kësaj vatre të madhe zjarri në Delvinë.
Shërbimet zjarrfikëse po përballen me pajisje dhe një flotë automjetesh tejet të vjetruara, duke nxjerrë në pah një problem të gjerë të mungesës së investimeve në infrastrukturën e emergjencave civile.
Ashtu si çdo vit, sërish po trokasim tek shtetet fqinje që të na ndihmojnë me avionë për të bërë të mundur shuarjen e zjarreve, të cilët dalin jashtë kontrollit.
Çfarë ndodhi gjatë natës
Banorët e Delvinës i kaluan orët e para të së mërkurës në rrugë dhe të panikosur nga frika e rrezikut të zjarrit të madh që përfshiu zonën. Ndërsa flakët përhapeshin me shpejtësi, vazhdimisht dëgjoheshin shpërthime municionesh, ndërkohë që Delvina ishte nën pushtetin e flakëve dhe të tymit.
Situata ishte tepër problematike, ndërkohë që era e favorizonte përhapjen e flakëve me shpejtësi.
Forca të shumta zjarrfikëse, të bashkive të jugut por edhe të ardhura nga Tirana, forca të ushtrisë dhe banorë bënë të mundur shuarjen e zjarrit që ishte pranë qytetit.
Rreth 10 qytetarë, mes tyre 4 nga forcat e ushtrisë, shfaqën probleme me frymëmarrjen dhe plagë të lehta, të cilët u trajtuan nga personeli mjekësor.
Ndërkohë, raportohet edhe për një viktimë të dytë, por deri më tania sgjë nuk është konfirmuar.
