Në një debat me një gjuhë të koduar këtë të mërkurë në Këshillin për Rregulloren, Mandatet dhe Imunitetin, u ngritën akuza për korrupsion ndaj bashkëshortit prokuror të deputetes socialiste Ermonela Felaj.
Akuzat i bëri kreu i grupit parlamentar demokrat Gazment Bardhi, i cili foli për “bluzë, lekë dhe korruptim prokurori” gjatë debatit me ligjvënësen socialiste Ermonela Felaj. Ai përmendi se ka një dosje hetimore dhe paralajmëroi se deputetja do të thirret për të dhënë sqarime për çështjen nga autoritetet ligjzbatuese.
“Unë mund të them ty për blerjen e bluzës të Toptani, që pastaj del … e pra, e di ti! Bluze te Toptani dhe pastaj korruptojmë prokurorin që të lirojmë personin. Prit, prit, se do kesh shumë mundësi të japësh sqarime dhe për këtë”, iu drejtua Bardhi-Felajt, i cili nisur nga akuzat, lë të kuptohet se ka dijeni për një rast korrupsioni për të cilin ekzistojnë edhe përgjime.
“Unë s’kam një dosje Ermonela, të kem dalë me bluze, Toptani, Lekët, mbyllje çështjesh, unë nuk kam të tilla raste”, shtoi ai.
Fjalori i koduar i Bardhit duket se i drejtohet bashkëshortit të deputetes socialiste, Bledar Valikaj, prokuror në Prokurorinë e Tiranës.
Akuza të ngjashme ndaj Valikajt ka pasur edhe më herët nga Bardhi, Partia Demokratike dhe në raportime mediatike.
“… Ke pushtuar prokurorinë e Tiranës për t’i vënë gjoba biznesit… Yt shoq, vetëm me çështjen e rimbursimit të TVSH-së ka marrë rryshfet 1.5 milionë euro nga 4 biznese. Kjo je ti, ti je një familje hajdute”, i tha Bardhi-Felajt gjatë një seance në parlament në korrik të vitit të kaluar.
Në mars të vitit 2019, nga oficer i policisë gjyqësore, Bledar Valikaj u gradua prokuror në Tiranë nga KLP përmes një procedure të diskutueshme. “Antikushtetuese”, sipas Partisë Demokratike. Edhe pse prokuror prej pesë vitesh, Bledar Valikaj nuk i është nënshtruar ende rivlerësimit nga organet e vetingut. Ky fakt është përdorur po ashtu nga opozita në akuzat drejtuar deputetes Felaj.
Ushtrimi i detyrës së disa të afërmeve të ligjvënëses pranë prokurorisë së Tiranës përveç bashkëshortit, ka qenë gjithashtu një tjetër “patate e nxehtë”. Kreu i PD-së Sali Berisha e ka cilësuar deputeten Felaj “simboli i nxirë i kapjes së drejtësisë shqiptare”, duke iu referuar punësimit të katër familjarëve të ligjvënëses në organin e akuzës së kryeqytetit (përveç bashkëshortit edhe motra, vëllai dhe kunata e deputetes Felaj).
“Nuk ka tallje më të madhe, nuk ka cinizëm më ekstrem që 4 familjarë të Felajt kryesojnë debatin për kapjen e institucionit në Prokurorinë e kryeqytetit”, tha kryedemokrati në një deklaratë për mediat në korrik të vitit të kaluar.
Shqetësime për çështjen kanë shprehur dhe ekspertë të fushës, si edhe disa anëtarë të Këshillit të Lartë të Prokurorisë, institucion që ka miratuar emërimet e familjarëve të Felajt. Deputetja ishte edhe firmëtare e ndryshimeve ligjore në vitin 2019, që i hapën rrugë punësimit të familjarëve të saj në Prokurorinë e Tiranës.
