Në një operacion të mirëorganizuar, Njësia Antidrogë e Policisë së Kosovës, ka arritur të sekuestrojë një sasi të konsiderueshme të narkotikëve që dyshohet se do të destinoheshin për në tregun e Bashkimit Evropian.
Gjatë një konference për shtyp të mbajtur të dielën, u bë e ditur se nga makina e të dyshuarit me inicialet A.L., me shtetësi shqiptare dhe kroate, janë sekuestruar 20 pako të narkotikëve të tipit heroine, shkruajnë mediat e Kosovës.
“Operacioni ka çuar në arrestimin e A.L., lindur në vitin 1959, i cili tashmë është në pranga dhe po intervistohet në prani të avokatit të tij,” – tha rreshteri Reshat Murseli.
E gjitha sasia e drogës, e cila peshon rreth 20 kilogramë dhe 60 gramë, ka një vlerë të konsiderueshme në treg; fillimisht vlerësohet të jetë diku në mes të 20 dhe 25 mijë eurove, por vlera totale në tregun e gjerë mund të arrijë deri në 200 mijë euro.
