Kompania shtetërore “Albpetrol” ka pranuar në mënyrë indirekte përgjegjësinë për ndotjen e Parkut Kombëtar të Vjosës, duke marrë masa për të shmangur përsëritjen e saj.
Pas një tenderi në korrik me vlerë rreth 100 mijë euro për riparimin e një impianti të trajtimit të naftës në Gorisht, kompania ka hapur një tjetër procedurë prokurimi prej 340 mijë eurosh për ndërhyrje të thelluara në të njëjtin impiant.
Sipas dokumenteve të siguruara, impianti që kryen ndarjen e naftës bruto nga uji ka qenë jashtë funksionit për muaj të tërë, duke çuar në mbushjen e kanaleve dhe përrenjve me naftë bruto, e cila më pas ka përfunduar në lumin Vjosë.
Ndërhyrja e planifikuar përfshin rikonstruksionin e dy depozitave dhe izolimin e tyre, si dhe ndërtim-montimin e rezervuarëve me termoizolim: 1000 m³ në dekantimin Gorisht dhe 200 m³ në grupet e grumbullimit nr. 1 dhe 3.
Vendburimi Gorisht-Kocul, që siguron rreth 91 ton naftë në ditë, është në një fazë të avancuar shfrytëzimi, me përmbajtje të lartë uji në përzierjen naftë-ujë, që arrin deri në 82%.
Për ndarjen e ujit nga nafta përdoren impiante me ngrohje të lëngut deri në 90°C, por defektet e pajisjeve kanë ndërprerë procesin. “Albpetrol” sqaron se kaldaja aktuale me vaj të nxehtë, e instaluar në vitin 2019, pësoi defekt në shkurt 2025, duke detyruar ndalimin e puseve për shkak të mungesës së kapaciteteve depozituese.
Ky vendburim ka qenë më parë me koncesion te “Stream Oil & Gas” (2011–2017), e cila ndërtoi një impiant ngrohjeje të quajtur “Kaldaja Italiane”. Pas shtetëzimit në 2017, prodhimi është menaxhuar nga kompania shtetërore, por problemet teknike dhe amortizimi i pajisjeve kanë shkaktuar ndërprerje të shpeshta.
Ndotja e Vjosës u bë publike pas denoncimeve të aktivistëve mjedisorë vendas dhe të huaj, duke nxitur reagime për përgjegjësinë e kompanisë dhe mungesën e masave parandaluese.
Tenderi i fundit pritet të financojë rikthimin e plotë të funksionit të impiantit, për të shmangur derdhje të tjera të naftës në mjedis.
