I ftuar në studion e Fax News këtë pasdite ishte avokati Altin Goxhaj. Për Rovena Nezirin, avokati komentoi ngjarjet e vitit që lamë pas si dhe ato që priten të ndodhin në 2024.
Sipas tij, këtë fundvit pritet të dalë një lajm shumë sensacional, që ka të bëjë me të dhënat e Censusit të para disa muajve. Goxhaj thotë, se nga zërat që qarkullojnë, qeveria po vonon në nxjerrjen e të dhënave pasi nga rezultatet dalin rreth 1 milionë e gjysëm shqiptarë banues në Shqipëri. Kjo shifër alarmante, sipas tij i kalon të gjitha parashikimet shpopullimit të vendit tonë.
“Lajmi më i fundit që pritet të shpërthejë këto ditë është rezultati i Censusit. Bëhet fjalë për të kuptuar sa veta kanë mbetur në Shqipëri pa ikur. Ky është thelbi i Censusit. Qarkullon një shifër e dalë nga analet e brendshme, çka ka shkaktuar edhe vonesën e pakuptimtë të qeverisë për të nxjerrë shifrat e Censusit, duhet të kishin dalë 2 muaj më para. Bëhet fjalë që në Shqipëri qenka regjistruar vetëm 1 milionë e gjysëm vetë. Pyetja është sa kanë votuar? Paskan votuar edhe 10 vjeç, 5 vjeç. Ndërkohë që po këtë javë doli një lajm po nga Genti Progni, një aktivist shumë inteligjent që, i cili plotëson një pazëll kundër rezistencës kundër establishmenti nëpërmjet njohurive të tij në fushën e teknologjisë-informacionit, i cili tha që 85 mijë njerëz u është zhendosur adresa gjatë në zgjedhjet e fundit që të votojnë në zonat e tjera. Në fakt të gjithë ishin emigrantë, asnjë nuk kishte ardhur në Shqipëri, të gjithë këtyre u është ndryshuar adresa për të shtuar 85 mijë vota në kutitë e votimit”, u shpreh Goxhaj.
Goxhaj shton se jemi në një fazë përshpejtimi të shpopullimit dhe i vetmi shans që mbetet është viti i ardhshëm, 2024.
“Jemi në një fazë të realitetit të përshpejtimit të shpopullimit që edhe unë nuk mund të parashikoja që në Census mund të ishin regjistruar 1 milionë e gjysëm njerëz.
2024 është i vetmi shans që kemi. Me këto shifra në 2024 nuk e kam idenë, mund të kemi kaluar atë pikën e tharjes së liqenit, të tharjes së liqenit”, tha avokati.
