Partia Demokratike ka denoncuar një tender të ri të Ministrisë së Mbrojtjes, duke akuzuar se ai është fituar nga dy kompani pronarët e të cilave kanë lidhje të ngushta familjare e politike me Partinë Socialiste. Sipas zëdhënëses së Antikorrupsionit në PD, Genta Vangjeli, tenderi tregon se si klientelizmi ka zëvendësuar konkurrencën e ndershme, madje edhe në sektorë që lidhen me sigurinë dhe mbrojtjen.
Tenderi me procedurë të kufizuar, me vlerë 460 mijë euro, kishte si objekt ndërtimin e rrethimit, sistemit të vëzhgimit, ndriçimit dhe portave të një prone të Ministrisë së Mbrojtjes në fshatin Mengël të Elbasanit. Sipas PD-së, në këtë tender u paraqit vetëm një ofertë, e cila u shpall fituese, me një vlerë që arrin në 98% të fondit limit.
Partia Demokratike thekson se bashkimi i operatorëve fitues përbëhet nga dy kompani me lidhje të qarta politike:
- “G & M CONSTRUCTION 07” sh.p.k., në pronësi të Maliq Zotkaj, djalit të kryebashkiakut të Poliçanit, dhe Oligert Dyrmishi, ish-drejtor në të njëjtën bashki.
- “ASI-2A CO” sh.p.k., në pronësi të bashkëshortit dhe kunatit të Eleni Gjikondaj, ish-zv/kryetares së Bashkisë Fier.
PD i bën thirrje organeve të drejtësisë që të hetojnë menjëherë këtë procedurë dhe kërkon që tenderat publikë të zhvillohen me konkurrencë të vërtetë, në shërbim të interesit publik dhe jo për të pasuruar klientët e pushtetit.
