Partizani ka një organikë të zgjeruar veçanërisht në sulm e në kuadër të kësaj klubi ka vendosur të largojë një prej tyre. Viktor da Silva, golashënuesi i sezonit të kaluar te të kuqtë, nuk u pa më pjesë e projektit dhe u njoftua për këtë nga trajneri Abilaliaj.
I ndodhur në këtë situatë, braziliani pranoi vendimin e klubit dhe firmosi ndarjen. Në lidhje me këtë çështje braziliani ka folur në një prononcim ekskluziv për “Panorama Sport”. Ai tregon detaje të reja në lidhje me pezullimin në muajin gusht, teksa zbulon se kërkoi takim me Abilaliajn, por ky i fundit nuk pranoi dhe përmes një mesazhi i komunikoi se nuk e ka në plane. Da Silva ka peng vetëm dëmtimet, teksa ndjen mirënjohje për presidentin Demi dhe drejtorin Rama.
Viktor, ishit ju që deshët të largoheshit nga Partizani apo klubi vendosi kështu?
Sinqerisht, unë doja të largohesha në muajin gusht, por siç i keni parë, gjërat nuk u realizuan dhe u desh që unë të qëndroja për të vazhduar punën time si një profesionist. Por fatkeqësisht, siç mund të ndodhë shpesh, unë u dëmtova dhe u ktheva në momentin e ndërrimit të trajnerit (Zekiç-Abilaliaj). Ai me të drejtë bëri vlerësimet e tij dhe erdhëm në një marrëveshje. Unë nuk mund të qëndroja në stol, sepse dua të luaj dhe të argëtohem në fushë. Doja të sqaroja edhe diçka për sa i përket pezullimit tim në muajin gusht. Ky veprim i klubit nuk ishte diktuar nga sjellja e keqe nga ana ime siç është thënë deri më tani. Në atë kohë unë i kisha thënë trajnerit (Zekiçit) se nuk isha në gjendje të jepja më të mirën për skuadrën, sepse doja shumë që të largohesha. Dua që të gjithë të jenë të qartë se nuk kam debatuar me askënd brenda klubit.
Keni pasur ndonjë bisedë me trajnerin dhe drejtorin Abilaliaj. Çfarë ju ka thënë ai?
Në fund unë kërkova një takim me të, por nuk donte. Ai vendosi të më dërgonte një mesazh se unë nuk isha më pjesë e projektit.
