Një person i tretë është vënë në prangat e policisë së Prishtinës mbrëmjen e kësaj të premteje për vrasjen e Liridona Murselit.
Ai është Kushtrim Kokalla, pjesëtar i Forcës së Sigurisë së Kosovës dhe nipi i Naim Murselit. Momentalisht nuk është e qartë cili është roli i tij në këtë ngjarje të rëndë, megjithatë ai dyshohet si bashkëpunëtor në krim.
Arrestimin e tij e konfirmoi vetë Ministria e Mbrojtjes së Kosovës.
“Në mesin e të arrestuarve si të dyshuar për vrasjen në Prishtinë është edhe pjesëtari i FSK-së, Kushtrim Kokalla. Organet e drejtësisë janë duke hetuar rastin, por gjithashtu ky rast do të trajtohet edhe brenda organeve përgjegjëse të FSK-së, sipas rregulloreve dhe ligjeve në fuqi. Ministria e Mbrojtjes dhe Forca e Sigurisë së Kosovës shpreh ngushëllime të sinqerta familjes së viktimës. Raste si kjo janë të izoluara, por si të tilla nuk guxojnë të na ndodhin. Siguria dhe mbrojtja e qytetarëve tanë është obligim!” thuhet në njoftimin e Ministrisë.
Pa u bërë 48 orë nga vrasja e 30-vjeçares, autoritetet në Kosovë vunë në pranga bashkëshortin e saj 33-vjeçar Naim Murselin dhe Granit Plavën. Liridona Murseli, nënë e dy fëmijëve u ekzekutua me armë zjarri mbrëmjen e së mërkurës, teksa udhëtonte me makinë me bashkëshortin dhe dy fëmijët.
33-vjeçari Naim Murseli pretendoi se ajo u vra gjatë një tentative grabitjeje. Megjithatë hetimet bënë që këtë të premte autoritetet hetimore në Kosovë të zbardhin të vërtetën: Vrasjen e Liridonës e porositi pikërisht bashkëshorti i saj.
Ai pajtoi si ekzekutor bashkëfshatarin e tij, Granit Plava. Ky i fundit në dëshminë e dhënë në polici tha se Murseli e kishte paguar 30 mijë euro.
Gjatë mbrëmjes, mediat në Kosovë raportuan po ashtu se vetë Murseli, i cili kishte punuar në të shkuarën si këshilltar i Behgjet Pacollit, e ka pranuar krimin në polici.
Shkaqet e kësaj ngjarjeje të rëndë nuk dihen ende.
Liridona Murseli ishte nënë e dy fëmijëve të mitur.
