Trajneri i kombëtares shqiptare Silvinho ka publikuar listën me 24 futbollistë të grumbulluar për dy ndeshjet e fundit kualifikuese për kampionatin europian 2024 që do mbahet në Gjermani.
Risia e Silvinho-s është Arbnor Muçolli, i cili është një nga lojtarët që po shkëlqen në elitën e futbollit suedez me fanellën e Goteborgut. Shihet gjithashtu që Armando Broja nuk ia ka dal dot të jetë pjesë e Kombëtares për shkak të dëmtimit të marrë një muaj më parë, gjë që e ka lënë jashtë dhe me Çelsin, teksa nuk është grumbulluar as Enea Mihaj. Për Marvin Çunin nuk ka mjaftuar goli i shënuar në Seria A, ku ka mbetur sërish jashtë liste.
Shqipëria do të luajë me Moldavinë në transfertë me 17 nëntor dhe tri ditë më pas me Ishujt faroe për të arritur objektivin “EURO 2024”, madje si kryesuese e Grupit E. Na mjafton edhe vetëm një pikë për të siguruar kualifikimin, por kuqezinjtë do synojnë vendin e parë në grup.
Sakaq, të gatshëm për të mbrojtur portën kuqezi, trajneri Silvinjo do të ketë Etrit Berishën, Thomas Strakoshën e Elhan Kastratin. Emrat që përbëjnë repartin e mbrojtjes janë Berat Gjimshiti, Ardian Ismajli, Ivan Balliu Campeny, Elseid Hysaj, Federic Veseli, Arlind Ajeti dhe Mario Mitaj. Në mesfushë e sulm, tekniku i Kombëtares shqiptare ka thirrur plot 14 lojtarë, duke nisur nga Ylber Ramadani, Kristjan Asllani, Keidi Bare, Klaus Gjasula, Qazim Laçi, Nedim Bajrami, Ernest Muçi, Myrto Uzuni, Taulant Seferi, Jasir Asani, Arbnor Muja, Arbnor Muçolli, Sokol Cikalleshi e Mirlind Daku.
