Shpëtim Duro prej afro një viti, pasi u largua nga Egnatia, drejton në kampionatin e Maqedonisë së Veriut, ku ka shkruar historinë për Strugën, duke u shpallur kampion dhe shkuar deri në “play off” të Ligës së Konferencës. Në një intervistë ekskluzive për “Panorama Sport”, ish-trajneri i Partizanit dhe një sërë ekipesh të tjera në Superiore e jo vetëm, flet për Strugën, por i bën edhe një analizë Superiores dhe Partizanit, klubit ku ka kaluar pjesën më të madhe të karrierës së tij sportive. Ai shprehet se skema i ka hequr emocionet kampionatit, teksa “demat” i sheh si ekip të kompletuar.
Sezoni i dytë juaji te Struga pas titullit dhe aventurës së suksesshme në Europë. Si po shkon ky bashkëpunim?
Është sezoni i dytë. I pari ishte fantastik me kurorëzimin e titullit kampion dhe në arritjen deri në “play off”-in e Ligës së Konferencës. Janë dy momente historike, që nuk do të harrohen lehtë për një klub si Struga. Sigurisht, edhe në këtë sezon, deri në këtë moment bashkëpunimi po shkon mirë në të gjitha aspektet.
Morët një fitore me shumë vlera ndaj Shkëndijës dhe tani jeni pranë kreut. Mund ta përsërisni suksesin e vjetshëm?
Po, arritëm një fitore ndaj një kundërshtari me traditë në futbollin e Maqedonisë, siç është Shkëndija. Arritëm një fitore shumë të rëndësishme dhe të merituar dhe kjo bën që të jemi pretendentë kryesorë për titullin, së bashku me ekipin tetovar dhe Shkupin. Mendoj se do të jetë një luftë treshe deri në përfundim të kampionatit.
Si ju duket ky sezon i Superiores? Janë të dukshme diferencat mes ekipeve?
E ndjek shumë edhe Kategorinë Superiore, është më se normale, por mund të them se e ka humbur disi atë emocionin dhe rivalitetin për shkak të formulës, dihet tani. Skuadra me traditë, siç janë Partizani dhe Tirana sidomos, sido që të shkojë puna, ato do të jenë në katërshe dhe humbjet e shumta nuk kanë ndonjë ndikim. Kjo mendoj se e ul interesin dhe bukurinë e kampionatit.
