Tirana zhvilloi një merkato të pasur në emra gjatë verës, por një gjë e tillë nuk po pasqyrohet në fushë. Bardheblutë po hasin vështirësi, teksa kanë pësuar 17 gola në 12 javët e para.
Në emisionin “ELITE SHOW”, nën drejtimin e moderatorit Gjergji Stefa, Bledi Shkëmbi, ish-kapiteni i Skënderbeut, u shpreh:
“Tirana? Kanë bërë merkaton më të mirë sa i përket emrave, por kjo Tiranë nuk luan futboll! E ndoqa edhe ndaj Skënderbeut, por përsëri nuk arriti të bënte një ndeshje të mirë.
Te Tirana, emrat e rëndësishëm duhet të japin maksimumin, vetëm ata mund ta kthejnë këtë situatë. Futbollistët janë ata që duhet të kthejnë situatën në favorin e tyre dhe të klubit.
Jemi edhe shpejt. Unë jam i bindur se Tirana do të jetë në fund të kampionatit aty ku duhet të jetë.
Nëse Tiranës i rikthehet besimi dhe disa lojtarë në formë, atëherë Tirana do të kthehet. Dhe kjo distancë me kreun do të zvogëlohet.
Sigurisht që lojtarët kanë përgjegjësi. Abazaj dhe Latifi nuk janë as në 60%, të paktën nga jashtë.
Edhe unë kam patur probleme kur luaja futboll. Dhe jam rikthyer. Prandaj them se Tirana do të rikthehet.
Në kampionatin shqiptar kanë shumë rëndësi si menaxhohen ndeshjet e humbura”, u shpreh trajneri korçar.
