Prej më shumë se dy javësh Kuvendi i Shqipërisë është përfshirë nga tensionet politike, edhe pse mazhoranca e Kryeministrit Edi Rama po perpiqet ta trajtojë si një situatë normale. Në fakt kemi një krizë që burimin e ka në Partinë Demokratike, por që ka perfshirë Kuvendin, për shkak të refuzimit për ngritjen e komisioneve hetimore dhe mospranimin e emrave të propozuar nga Gazment Bardhi që drejton grupin më të madh të deputetëve të opozitës.
Opozita ka pershkallëzuar protestën e saj në Kuvend në një tentativë për të detyruar Ramën, por edhe për të tërhequr vëmendjen e ndërkombëtarëve. Tensionet apo krizat e mëparshme politike janë zgjidhur apo janë minimizuar me ndërhyrje diplomatike. Por këtë rradhë ka një heshtje totale, edhe pse deputetë të PD kanë deklaruar se i kanë informuar ambasadat kryesore në Tiranë.
Shkaku i heshtjes duket se ka lidhje me krizën në PD ku diplomatët kanë një qëndrim, pothuajse izolues ndaj PD që drejtohet nga Sali Berisha. Ndoshta kjo është arsyeja e parë që ata nuk reagojnë, edhe pse ka një hipotezë se ndërhyrja mund të vijë me përshkallëzimin e lëvizjes opozitare në kuvend.
Arsyeja e dytë e heshtjes ndoshta ka lidhje me faktin se SPAK ka vendosur nën hetim Berishën, i cili prej dy javësh, ccdo ditë artikulon akuza të forta ndaj prokurorëve, pjesë e strukturës më të investuar dhe më të mbështetur ndërkombëtarisht. Dhe nisur nga kjo diplomatët ndoshta e kanë të veshtirë të luajnë rolin e një negociatori mes grupimit Berisha dhe Qeverisë, përsa kohë ai sillet si lideri absolut. Dhe me një mazhorancë absolute, një opozitë të ndarë dhe në krizë lidershipi, pa një angazhim ndërkombëtar duket e veshtirë që tensionet të prodhojnë një krizë, përsa kohë Edi Rama nuk ndodhet nën presionin diplomatik.
