Vetëm një muaj më parë, në tetor 2023, qeveria lehtësoi procedurat për marrjen e nënshtetësisë shqiptare për të gjithë sportistët e talentuar të cilët duan të përfaqëojnë Shqipërinë në evenimentet sportive europiane dhe botërore. Por, e njejta gjë nuk vlen për shqiptarët që kanë kontribut patriotik. I tillë është rasti i ish-luftëtarit shqiptar të UÇK-së, Meçan Zotaj.
I lindur në Mallakastër, me pasaportë shqiptare, Zotaj akuzon qeverinë se nuk po i jep bashkëshortes së tij shqiptare të Kosovës, nënshtetësinëedhe pse kanë mbi 23 vjet martuar.
Nëpërmjet një shkrimi në Facebook, Zotaj deklaron se madje në Presidencë i kanë vonuar me 10 muaj dokumentacionin, në mënyrë që atyre t’i kalojë afati i vlefshmërisë.
Shkrimi i plotë i Meçan Zotajt:
“Lajmi më dëshpërues që më ka ardhur nga Shqipëria ishte para dy ditësh.
I martuar me Luljeta Kadri Aliu, shtetasen kosovare prej 1 shtatorit 2000, ku si fryt i martesës lindën 3 (tre) fëmijë.
Herolindi 22 vjeç
Drenisa 17 vjeç
Jona 11 vjeç
Kërkesa e bashkshortes time për të fituar nënshtetsinë Shqiptare u refuzua nga zyra e Presidentit të Shqipërisë.
I plotësuam të gjitha dokumentet e kërkuara nga shteti i Shqipërisë.
Dokumentat kaluan si të rregullta nga Ministria për në zyrën e Presidentit.
Nga qendrimet e mia anti-sistem në Shqipëri, kritikat e dhena haptas në media të ndryshme Shqiptare se Edi Rama si vegël e Beogradit më shumë e ka dëmtuar Kosovën në vend se ta ndihmonte atë, nuk i kanë pëlqyer çakenjve te institucioneve Shqiptare.
Ata si praktikë mafioze zbatojnë hakmarrjen përmes administratës, aparatit mafioz-shtetëror.
Në të gjitha njoftimet nga zyra e Presidentit lexoj vetëm dekretime për lënien e nënshtetësisë Shqiptare, jo për fitimin e saj, madje as nga Shqiptarët e Kosovës, si rasti i bashkëshortes time e cila ka kurorë prej vitit 2000 me mua si shtetas i Shqipërisë.
Nuk më habit ky qëndrim antikombëtar, e shikoj përditë poshtërsinë, tradhetinë në levizjet proserbe dhe progreke të qeverisë Shqiptare. Madje nga zyra e Presidentit u vonua përgjigjja deri në kalimin e afatit të dokumentave, burokracia anti-Shqiptare kërkon që t’i nisim nga zeroja kërkesat tona.
Fjalët që më vran në shpirt ishin ato që m’i tha bashkëshortja e trishtuar: Njëjtë si serbët na kanë trajtuar, shpenzime, vuajtje, kërkesa pa fund dhe përsëri refuzim.
Pas plotësimit, rishikimit dhe dorëzimit të dokumentave, e priste me padurim dhe me plot entuziazem marrjen e nënshtetësisë Shqiptare.”
Zotaj është aktivizuar shpesh në televizionet shqiptare për çështjet kombëtare, madje ai është dhe iniciator për rikonstruksionin e lapidarit të viktimave të andartëve grekë në Hormovë të Tepelenës, memorial ky që nuk u lejua të ndërtohej nga Bashkia, e cila ende mban punimet pezull.
