Jeta Deda ka dhënë dorëheqjen si drejtoreshë e AKU-së. Ndonëse nuk dihen arsyet e këtij vendimi, në një postim në rrjetet sociale ajo falenderon bashkëpunëtorët dhe kolegët e saj.
Jeta Deda ka thënë gjithashtu se tashmë po bëhet gati për angazhime të reja, por nuk ka zbuluar më shumë detaje.
Ndoshta dorëheqja e Dedas lidhet me ndryshimet që pësoi Ministria e Bujqësisë ku në vend të Frida Krifcës u emërua Anila Denaj. Tashmë është një praktikë ku pas ndryshimit të ministrit, ndryshon gjithë zinxhiri drejtues i institucioneve në varësi të Ministrisë.
Postimi i Jeta Deda
Të nderuar miq e kolegë,
Ndahem nga një ekip, të cilin e falënderoj për çdo punë të mirë të kryer së bashku.
Shpreh mirënjohjen e thellë ndaj Kryeministrit e Këshillit të Ministrave për besimin e dhënë dhe ish-Ministres Krifca dhe Ministres aktuale Denaj, me të cilat arrita të bashkëpunoj gjatë kësaj udhe.
Po ashtu, mirënjohëse ndaj stafit të Autoritetit Kombëtar të Ushqimit për mundësinë e shërbimit në këtë detyrë, pasi mbështetja juaj e pakufi dhe bashkëpunimi kanë qenë kryefjala në gjithë rezultatet e arritura së bashku në lëmin e sigurisë ushqimore.
Një falenderim i veçantë i takon ekspertëve shumëvjeçarë në Ministrinë e Bujqësisë dhe Zhvillimit Rural dhe në Autoritetin Kombëtar të Ushqimit. Dedikimi dhe puna e tyre janë rregullatorët e sistemit dhe standardeve që duam të vendosim, në rrugëtimin drejt integrimit europian e kryesisht në shërbim të atdheut.
Nuk kam dyshim se kjo skuadër do të shkëlqejë me këdo menaxher që iu bashkohet.
Teksa bëhem gati për angazhime të reja, e shikoj kohën si Drejtore e Përgjithshme e AKU-së me mirënjohje të thellë për përvojën e marrë, dijet e përftuara dhe marrëdhëniet e mira të ngritura.
Falenderime për mbështetjen dhe besimin gjatë këtij rrugëtimi! Ka qenë nder të shërbej në këtë detyrë.
Përzemërsisht.
