Prokuroria e Posaçme Anti-Korrupsion finalizoi në fundjavë një urdhër arresti dhe masa kufizuese për dy personazhe të tjerë, në kuadër të hetimit që ka nisur 3 vite më parë për privatizimin e kompleksit Partizani.
SPAK ndaloi në mjediset e aeroportit “Nënë Tereza” dhëndrin e ish-Kryeministrit Sali Berisha, Jamarbër Malltezin, ndërsa paralelisht me të, iu komunikua masa “detyrim paraqitjeje” dhe ndalim dalje jashtë vendit, biznesmenit Fatmir Bektashi.
Vëmendjen më të madhe e mori ish-Kryeministri Sali Berisha, ndaj të cilit SPAK dhe më pas GJKKO kishte vendosur masa kufizuese, të njëllojta me atë të biznesmenit Bektashi.
Shpejt debati u përqëndrua te procedurat, veçanërisht në rastin e ish-Kryeministrit, i cili ka edhe mandatin e deputetit. Dhe në këtë kuadër, lindi debati, që ende vijon, nëse SPAK duhej ose jo të kërkonte autorizim nga Kuvendi, për caktimin më pas të masave të sigurisë.
Personazhi që flitet më pak në media është pikërisht ndërtuesi Bektashi, i cili ashtu si edhe Berisha është mbi 70 vjeç, dhe ndoshta kjo është arsyeja sepse i shpëtuan një mase arresti më të rëndë nga Prokuroria Speciale.
Maska.al ka mësuar se Bektashi zotëron pasaportën gjermane, ndërsa prej vitesh jeton në Gjermani. Referuar të dhënave, të gjithë dokumentet që ka biznesmeni janë gjermane, kjo për faktin se Gjermania nuk lejon dyshtetësinë.
Në dukje një detaj i parëndësishëm, por në thelb GJKKO me vendimin e saj, i ka ndaluar ndërtuesit që të përdorë pasaportën dhe dokumentet e tjera identifikuese të vlefshme për të dalë jashtë vendit. Nuk dihet nëse ndërtuesi, i cili po hetohet bashkë me Malltezin dhe Berishën, për akuzat e korrupsionit dhe pastrimit të parave është ankuar ose jo, qoftë edhe te autoritetet gjermane për bllokimin e pasaportës, por nuk përjashtohet mundësia që në ditët në vijim, autoritetet shqiptare, përfshi edhe GJKKO, të kontaktohen dhe t’u kërkohet sqarim lidhur me shtetasin Fatmir Bektashi, me kombësi shqiptare, e nënshtetësi gjermane.
E ndërsa Bektashit, sipas vendimit të GJKKO, i është bllokuar pasaporta dhe çdo mjet tjetër identifikimi të lëshuar nga autoritetet gjermane, në anën tjetër ish-Kryeministrit Berisha nuk arrijnë ti dorëzojnë në dorë njoftimin për vendimin e Gjykatës.
