Një 35-vjeçar shqiptar ka kaluar momente të vështira në Itali, pasi është pickuar nga një grerëz në brendësi të gojës, ndërsa po konsumonte mëngjesin në një lokal pranë portit.
Sipas raportimeve të mediave italiane, incidenti ndodhi teksa shqiptari kishte porositur një ëmbëlsirë me krem pastiçerie. Pa e kuptuar, mbi ëmbëlsirë ndodhej një grerëz, e cila e pickoi në gojë në momentin që ai kafshoi ushqimin.
Pas dhimbjeve të forta, 35-vjeçari kërkoi menjëherë ndihmë mjekësore. Në vendngjarje mbërritën ekipet e emergjencës, të cilat i dhanë ndihmën e parë përpara se ta transportonin drejt spitalit Torrette.
Shqiptari u paraqit në spital me kod urgjence të gravitetit mesatar. Mjekët i administruan medikamente për të parandaluar një reaksion të rëndë alergjik, duke pasur parasysh rrezikun e shfaqjes së shokut anafilaktik, një gjendje potencialisht kërcënuese për jetën.
Ngjarja shkaktoi shqetësim për shkak të rrezikut që mund të paraqesë një pickim insekti në pjesën e brendshme të gojës.







