Sekretari i Përgjithshëm i NATO-s, Mark Rutte, do të zhvillojë të shtunën një vizitë zyrtare në Varshavë, pas incidentit të fundit në të cilin dy raketa ruse dhe një dron shkelën hapësirën ajrore të Polonisë.
Vizita vjen në një moment tensionesh të shtuara në rajon, pasi incidenti u regjistrua gjatë një vale të re sulmesh ruse ndaj Ukrainës.
Kryeministri polak, Donald Tusk, bëri të ditur se kishte zhvilluar një bisedë me kreun e NATO-s, ku diskutuan situatën e krijuar dhe hapat që Aleanca duhet të ndërmarrë në përgjigje të saj.
Gjatë një konference për mediat të premten, Tusk konfirmoi se Rutte do të mbërrijë në kryeqytetin polak të shtunën dhe do t’u përgjigjet pyetjeve të gazetarëve lidhur me reagimin e NATO-s ndaj incidentit.
Kreu i qeverisë polake nënvizoi se pret masa konkrete dhe të menjëhershme për rritjen e kapaciteteve mbrojtëse në krahun lindor të Aleancës, veçanërisht në fushën e mbrojtjes ajrore.
“Gjithmonë përpiqem të shmang krijimin e panikut dhe të jem një partner serioz për ata me të cilët komunikoj. Megjithatë, këtë herë pres që në ditët dhe javët e ardhshme të merren vendime konkrete për forcimin e kapaciteteve tona të mbrojtjes ajrore”, deklaroi Tusk.
Kryeministri polak u kërkoi gjithashtu gazetarëve që të shfrytëzojnë praninë e Mark Rutte në Varshavë për të marrë më shumë detaje mbi hapat që NATO planifikon të ndërmarrë.
Takimi pritet të përqendrohet te siguria e krahut lindor të Aleancës, forcimi i sistemeve të mbrojtjes ajrore dhe koordinimi i përgjigjes së vendeve anëtare ndaj shkeljeve të hapësirës ajrore polake.







